mi lon
mi lon.
lon ma seme?
lon sinpin pi tomo sina. sina ken ala ken lukin e mi?
mi ken ala. sina lon ala lon nasin lon?
mi lon nasin Sameno. ni li nasin lon ala lon?
lon. mi kin li tawa sinpin tomo.
“toki a! mi lon!”
mi toki e ni: “mi lon!”
taso sina lon ala.
jan ala li lon poka mi.
jan li ala ala ala?
jan li ala ala a.
nasa a. nasin Sameno la jan mute li lon tenpo ale.
mi lukin e jan mute lon tenpo ni a!
lon…
seme li lon? nasin ni li suli ala.
ken la mi lon ala.
sina ken ala “lon ala”. sina pilin la sina lon.
jan Kene Teka.
sina jan sona.
taso sina kin li jan sona ala.
sina tawa nasin ike.
ala. mi sona e tomo sina! mi nasa ala.
tomo sina li loje.
tomo laso li lon poka ona.
kasi pi kili loje li lon sinpin ona.
lon... seme? o pana e sitelen.
a, sina pona! mi pali e sitelen li pana e ona tawa sina.
kalama pi ilo sitelen
sitelen li tawa
sitelen li lon
a! mi ken lukin e sitelen sina.
lon a, ni li tomo mi.
taso…
taso seme?
taso ni li tomo mi.
kalama pi ilo sitelen
sitelen li tawa
sitelen li lon
ni li ken ala.
ni li ken ala.
taso…
lon.
sitelen sina la kili li lon ala.
sitelen sina la kili li lon.
jan pona mi o, mun nanpa seme li lon?
mun nanpa wan.
ken ala!
ken ala!
suno pini la mi tu li tawa lon telo!
suno pini la mi tu li lon poka ala.
tenpo suli la mi tu li lon poka ala.
sina ken ala ken lukin e jan ante a?
ken ala.
o tawa.
ma seme?
o tawa nasin ante.
mi tawa, mi tawa.
sina ken ala ken lukin e jan?
ken ala. mi lon open pi nasin Sameno.
o tawa kin!
jan ala.
tomo tawa ala.
mi kute ala e kalama waso.
mi moli lon ma ni.
sina moli ala.
ni li nasa.
ni li lon ala.
NI LI LON!
MI KEN ALA A WEKA!
o awen pona. o kon.
mi kon.
lon a. mi kon.
sina kon?
mi kon anu… jan li kon?
sina ken ala lukin e mi.
mi ken ala lukin e sina.
soweli ala li lon.
tenpo li tawa ala.
o tawa tomo mi.
tan seme?
o tawa.
o kute e mi.
o tawa.
pona a. mi tawa.
sina lon tomo mi?
mi lon tomo sina.
o tawa kasi.
mi lon poka kasi.
sina jo ala jo e ilo kipisi?
mi jo e ilo open.
o kepeken e ona.
tawa seme?
o pakala e kasi kepeken ona!
tan seme?
o kute taso.
o sitelen kepeken ona.
pona. mi sitelen e nimi mi lon kasi kepeken ilo open mi.
nasa.
nasa ala.
k-k-k-kipisi
mi pini.
mi sona.
sina sona tan seme?
mi lukin e nimi sina lon kasi.
seme a?!
sina lon.
mi lon.
lon tenpo pini.