toki ni li musi. taso toki pi jan wan taso li musi lili. toki kulupu li musi suli. ni la, mi kepeken toki ni lon poka pi jan ante la, musi li suli pona. mi ken lon kulupu kepeken ilo toki. toki kulupu li ken lon ona. taso mi en jan ante li lon ma sama la, toki kulupu li wawa a! tan ni la, mi wile kama e kulupu lon ma wan.

kulupu li tawa ma Panse¹ li kama lon ma lili Sapu².

kulupu lawa pi ma Elopa li toki e ijo lawa lon ma tu wan. ma wan li ma Lusenpu lon ma suli Lusenpu. ma ante li ma Puse lon ma suli Pesike. suli la, ma lawa li ma Sapu lon ma suli Panse. telo suli li tawa lon ona la, poka ante pi telo ni li ma Ke³ lon ma suli Tosilan⁴. tomo lawa pi ma Elopa li lon ma Sapu la, mi kulupu li wile lon ona. kulupu li suli la, ni li wile e wawa. taso wawa li lon!

ijo tenpo

tenpo li seli la, ma kasi li pona. taso ike la, tenpo open la, sewi li utala e kulupu kepeken telo. ni la, mi tawa insa tomo. jan mute li pana e sitelen nimi ale tawa lipu ona wan. taso kin la, kulupu li pana e sitelen nimi ale tawa lipu kulupu wan. ni la, ale li ken kepeken ona lon ilo. o alasa e nimi ni: “sitelen pona Elopa pi ma Sapu”. mi mute mute tu li pana e sitelen tawa lipu kulupu.

mi pini e pali sitelen la, kulupu li kama sona, li kama tu. kulupu wan la, jan pona sona Olipija li pana e ijo pi luka pona tawa sona kulupu. ni la kulupu li ken toki kepeken kalama uta ala, kepeken sijelo, kepeken tawa, li ken sona e nasin pi toki ante, e nasin pi kulupu ante. kulupu ante li alasa e nasin pi sitelen suwi, li kama sitelen kule e lipu kepeken ona.

mi lape la tenpo suli li kama: kulupu li tawa tomo lawa pi ma Elopa. tomo li suli a li sike a! kulupu lawa li kepeken ala tomo ni lon tenpo ni la, mi ken tawa lon ona, li ken lukin e ijo sona. mi weka tan tomo lawa la, mi tawa tomo kulupu. jan pi ma Sapu li kama kulupu li kama pali e tomo pi kule mute tawa kulupu. ike lili la, mi ken ala lon insa tan ni: pipi li moku e len lon insa tomo. taso mi ken lon ma kasi pi tomo ni, mi ken lon sewi tomo kin. mi musi mute, mi toki pona, mi kalama suwi. sina lukin e toki ni lon lipu tenpo la, kulupu pi lipu ni li toki kulupu e ijo lawa, li pana e lipu mute tawa kulupu, e telo moku musi kin tawa kulupu: telo Toki en telo Pona, a a a!

mi lape sin la, mi tawa insa pi ma Sapu. tomo sewi pi suli sewi li lon, ijo musi en tomo sona li lon poka la, mi kama ken lukin e ijo pi tenpo ante. ale la, mi alasa e moku. kulupu li tu lon tenpo mute, li musi ante lon ma tu. kulupu wan li tawa lon sinpin, kulupu ante li kalama, kulupu li ken lape, li ken moku, li ken musi.

sina kin li wile lon kulupu la, o kama a! mi pi ma Elopa li tawa ma Epanja lon tenpo seli kama. mun li moku e ale suno la, mi wile lukin e weka suno ni a! sina lon ala ma Elopa la, o alasa, kulupu li ken lon weka pi ike ala.

wawa kulupu

ale pi tenpo kulupu la, mi kama lukin e ijo namako lon kulupu. open la, jan wan li kama e musi lipu pi nimi ni: musi Wan. taso tenpo kulupu li kama pini la, kulupu li kama pali e musi pi nimi ni: musi Tu. sona musi taso ala li lon kulupu: mi kute e kalama lon tenpo mute. ilo kalama tu tu anu sama li lon la uta en ilo li kalama suwi a. jan ante li toki e pali ilo ona tawa kulupu. jan mute li kama pali e sitelen. pona wawa a!

mi lukin e wawa ante kin: mi lukin e olin. olin pi lon kulupu li lon, olin tonsi kin en olin kin pi pali poka li lon. jan li pu olin e nimi ona: nimi mute li kama lon lipu pu. jan li kulupu e sijelo lon poka. olin li wile wawa e pilin pona lon. taso olin li wile suwi e pilin ike kin. mi weka, taso olin sina li awen, kulupu o!

¹ ma France
² ma Strasbourg
³ ma Kehl
⁴ ma Deutschland