jan pi tenpo pini li kama jo e moku kepeken seme? open la nasin wan taso li lon. jan o alasa. tenpo mute la jan mije li alasa e soweli e kala e waso. jan meli li alasa e kili, li pali e ilo, li awen e kulupu. alasa la jan li ken moku e soweli e kili lon ma poka taso. moku poka li mute ala la, kulupu jan o kulupu lili. lili la jan ale kulupu li sona pona e jan ale kulupu. kulupu la ona li jan sama. jan lawa li lon ala.

jan pi nasin alasa li seme lon tenpo pi alasa ala? ona li pali e ilo alasa tan kiwen ma, tan kiwen sijelo, tan kiwen kasi. ona li len e ona kepeken selo soweli. ona li sitelen e soweli. ona li selo e ko kepeken luka la, ko li kama sama selo pi jan meli tawa lukin. ona li kama sona seli e kasi. seli suli la, kulupu li ken weka e soweli monsuta. jan li seli e sijelo soweli la sijelo li awen pona lon tenpo suli.

jan li awen lon lupa ma anu seme? awen. lupa li awen e kulupu la, pona. kulupu li ken awen lon lupa lon tenpo suli a. taso lon la, ona li pali e tomo kin. ona li kepeken kiwen kasi li kepeken selo soweli. kulupu li wile weka tan ma wan li wile tawa ma sin la, tomo ni li pona tawa kulupu.

nasin alasa la ike li seme? tenpo sike pini WAMA la kon li kama seli. ma Apika en ma Asija la ma mute li kama ike tawa kasi tawa soweli. taso jan li sona mute, li wile ala moli tan lili moku. ona li pana e kili pan lon ma pona la, tenpo sike kama la kasi pan li kama lon ma ni. jan li kepeken sona ni, li pali e pan lon ma poka.

nasin pan li wile e pali e ilo. jan o pona e ma pan. jan o weka e kasi ike tan ma pan. jan o pana e telo tawa ma pan. ni ale li pali suli. kulupu jan o kama suli o pana e pali suli. kulupu li jo e soweli la, ona li ken pana e ilo lon soweli. ni la soweli li pali e pan. jan li jo e soweli mute e ilo mute la ona li ken pana e ona tawa jan lili ona. ni la kulupu wan li jo e ijo mute. kulupu ante li jo e ijo lili. kulupu wan li kama lawa e kulupu ante. nasin mani li kama lon.

nasin pan li ante suli e kulupu jan. tenpo pini la kulupu jan o lili. tenpo ni la kulupu o kama suli. tenpo pini la jan ale kulupu li sona pona e jan ale kulupu. tenpo ni la kulupu li suli ike la, jan li ken ala sona pona e jan ale. tenpo pini la jan ale li sama li pali sama. tenpo ni la jan wan li lawa e jan ante.

jan li pali ala e kasi la, ona li ken pali e ijo ante. ken la ona li pali e poki kepeken ko kepeken seli. ken la ona li ko e pan kepeken kiwen suli. ken la ona li toki e nasin sewi tawa kulupu. ken la ona li tawa kulupu ante li esun e ijo. ken la ona li pali e tomo.

nasin pan li ike e sijelo. jan li moku e pan taso li moku ala e kili e soweli la, sijelo ona li kama wawa ala. sijelo li wile e ko mute ante e ko wan taso ala. kin la jan mute li lon kulupu wan la, jaki sijelo li ken pakala wawa e ona ale. ni la jan pi nasin pan li wawa ala sijelo. jan pi nasin alasa li wawa pona sijelo.

kulupu ale li pali e pan sama anu seme? sama ala. ma Apika la, pan wan li lon. ma Asija la, pan ante. ma Amelika la, pan ante kin. ma Papuwa la, jan li pali e kili pan. ma Oseja la, jan li kama wile ala pali e pan. nasin alasa li awen pona tawa ona. tenpo lon la jan li ken esun e pan ale lon ma ale. ona ale li pona tawa uta.