jan li lon.
kulupu li lukin e ona.
kulupu li toki
li kepeken e nimi ike wan.

nimi ike ni li toki e ni ale:
​ « kon awen sina li mije »
anu:
​ « kon awen sina li meli »

« ...open sina la kon sina li ni a.
moli sina la kon sina li sama.
kon awen sina la
ante li ken ala. »

toki pona la nimi ike wan ni[^1] li lon ala.
ala li awen.
nimi pali taso.
ale li ante.

ni pi toki pona li sama ijo ale.
ijo ala li awen.
ale li pali taso.
telo li tawa.
kala li kala.
suno li seli.
kasi li suli.
ijo ale li ante.

jan li sama ijo ale.
jan ala li jo e kon awen.
jan ale li pali taso
li toki taso
li pilin taso.
tenpo ale la jan li pilin ante
 li toki ante
 li pali ante.
jan ale li ante.

jan tonsi li kama sona e ni.
sama telo la
ona li tawa.
a sama jan ale
la ona li ante.

tonsi li ike ala.
jan li toki
« mi tonsi »
la ona li tonsi.
tonsi li ni taso
li toki taso
li pali taso.
jan ale li ken ni.

ken la sina toki:
« kulupu li meli e mi. »
anu:
« li mije e mi. »

« ... taso mi pilin ni ala. »

toki ni li tonsi.
sina toki e ni la sina tonsi.
tonsi li pona tawa sina la, o tonsi kin!

ken la tonsi li ante e lili.
ken la tonsi li wawa li suli.
ken la tonsi li pilin pona.
ken la ona li ike a.

ale la tonsi
li tawa taso.
sina ken open.
sina ken awen.
sina ken pini.
— tonsi li telo.

[^1]: toki ante la, nimi ike ni li nimi “to be”, “être”, “sein”, “ser”... sina wile sona e toki mi la, o kepeken ala e nimi ike ni!