sina sona e mun Satunu la, sina sona e ni: mun Satunu li jo e sike suli. taso sike ni li seme? sike ni li kama tan seme? sona ni li wawa li musi mute. ni la, mi wile toki e sike pi mun Satunu.

taso nanpa wan la, mi toki e mun Satunu. mun pi tawa sike suno la, mun Satunu li suli nanpa tu. suli nanpa wan li mun Jupite. ona tu li kiwen ma ala li mun pi kon mama telo (H₂). ona tu li suli sama ni: sina ken lukin e ona kepeken lukin taso. kin la, ona tu li jo e mun lili mute. taso ona tu li ante suli tan ni: lukin la, mun Satunu li jo e sike.

sike ni li seme? ona li mun lili mute a! taso mun lili ni li kiwen ma ala. ona li telo kiwen lete. ona mute li lili sama moku suwi. ken la, sina ken moku e ona!

tan seme la, telo kiwen ni li pona moku? mun Satunu li majuna mute sama suno. taso sike ona li majuna sama ala. tenpo pini lili la, kulupu pi jan sona mun li pali e ilo mun Kasini (Cassini). kulupu li weka e ilo tan ma, li tawa e ona tawa mun Satunu. tenpo mute la, ilo Kasini li awen tawa sike pi mun Satunu. ona li lukin pona e mun Satunu, e mun pi mun Satunu, e sike pi telo kiwen. suli la, ona li toki tawa kulupu e ijo lukin ale. kulupu li lukin e toki pi ilo Kasini. nasa la, ona li kama sona e ni: telo kiwen li jaki ala. ni la, telo kiwen li sin.

telo kiwen sin li kama tan seme? jan ala li sona. taso kulupu sona wan li pali e sona ken. kulupu ni li pali e mun Satunu nasa kepeken ilo sona wawa. kulupu li ken ante e nasa, li ken lukin e kama pi ilo sona. nasin ni la, ona li alasa e lon kepeken nasa. sona ken pi kulupu li ni: tenpo pini la mun suli tu pi mun Satunu li pakala tawa e ante. mun tu ni li telo kiwen. ona li pakala la, ona li kama telo kiwen lili mute.

ni la, sina kama sona pona e sike pi mun Satunu. ona li telo kiwen lili. ken la, ona li kama tan pakala suli mun lon tenpo pini. sona ni li wawa, taso ijo pi sona ala li lon kin. tenpo kama la, kulupu sona mute li awen kama sona e sike pi mun Satunu.