jan li wile toki e kule la ona li kepeken e nimi seme? jan mute pi toki pona li kepeken e kule luka. toki ale en kulupu ale li jo e nasin kule ante. taso nasin ale ante la seme li sama? jan sona tu li toki e ni. toki ale li jo e kule tu ni: pimeja en walo. jan Ke (Kay) en jan Pelin (Berlin) li pali e nasin kule ni: open la toki li jo taso e pimeja e walo. ona li kama e loje. laso anu jelo la ona li kama e kule wan ni. kama la laso en jelo li lon. ni li kule ale pi toki pona: pimeja en walo en loje en jelo en laso. nasin kule ni li ken ike. taso mute la ona li pona li ken ike.

jan Ke en jan Pelin la nasin kule pi toki pona li nasa. nasin ona la open la peta li lon – laso li lon ala. taso toki pona la laso li lon – jan li kepeken lili e nimi peta. ante la jan li kepeken e nimi kapesi lon tenpo suli. ni li pakala kin e nasin Ke Pelin. jan sona mute li toki e ni: nasin Ke Pelin li pakala li ike. nasin ona li kepeken e sona taso pi ma Elopa. jan li ken ala nanpa e kule. ona li nanpa e kule la ona li toki kin e ni: toki ni li wawa. toki ante li wawa lili. ni li ike. mi la ni ale li lon. nasin kule li ante mute. mi wile pana e sona ona tawa sina:

toki ale la lili la kule tu li lon. suli la kule luka luka tu li lon. toki Inli li kepeken e kule luka luka wan. toki pona li kepeken e kule luka. lon la sina ken kepeken e nimi sin (kapesi) anu nimi tu (loje jelo). taso mi nanpa taso e kule ni: jan mute li kepeken e ona li toki e ni: ona li kule wawa li kule namako ala.

toki lili li kepeken kule tu taso. toki wan ni li toki Pasa. jan li kepeken ona lon ma Lipelija. kule tu ona li kule “ziza” tawa walo tawa jelo tawa loje li kule “hui” tawa pimeja tawa laso. toki pi kule tu la kule wan li kule seli anu kule suno. kule ante li kule lete.

toki Panpala li jo e kule tu wan. kule “dyema” li walo anu jelo. kule Lema (blema) li loje anu kapesi. kule “fima” li laso anu pimeja. taso toki ante la kule li ken kama nasa li sama ala nasin pi toki pona.

toki Owawinpa (Ovahimba) la kule tu tu li lon. kule “zuzu” li laso pimeja anu loje pimeja. kule “vapa” li walo li ken jelo. kule “buru” li laso. kule Tanpu (dambu) li loje li laso jelo. mi ken ala toki pona e kule ni kepeken ala sitelen. taso suli la kule ona li ante tan pimeja ona. ni li nasa tawa mi tan ni: toki pona la kule li kama walo li kama pimeja la ona li ante ala li awen kule sama. taso nimi kapesi li sama ni. loje jelo li kama pimeja la ona li kapesi.

taso toki seme li kepken e kule luka luka tu? kule ni li seme? toki mute li kepeken e kule pi nanpa ni. kule luka luka wan li kule ni: pimeja, walo, loje, peta (laso kasi), jelo, laso sewi, loje jelo pimeja (kapesi), loje jelo (nalanja), loje walo, laso loje (unu), walo pimeja. toki Italija en toki Losi la kule nanpa luka luka tu li kule laso. ona li kepeken e nimi tu tawa kule laso: laso walo (toki Losi: голубой, goluboi) en laso pimeja (синий, sinii). toki Tuki en toki Mosijo la kule namako li kule loje. ona li kepeken e nimi tu tawa kule loje. toki Alan la kule namako li nasa a. ona li kepeken e nimi tu tawa kule laso kasi. ona li kule “glas” tawa kule kasi anu kule soweli li kule “uaine” tawa kule pali. tomo en lipu li laso kasi la ona li kule “uaine”. soweli en kasi li laso kasi la ona li kule “glas”.

pini la mi wile toki e kule laso. toki mute la nimi tu li lon: laso kasi en laso sewi. mi kepeken e nimi tu ni tan ni: toki mute la nimi kule li kama tan kule sewi li kama tan kule kasi. toki Posuka la kule laso sewi li jo e nimi ni: “niebieski”. ona li kama tan nimi pi ma sewi: “niebo”. toki Ekala (toki Ekala: euskara; toki Inli: Basque) li kepeken e nimi ni: “urdin”. ona li laso telo li tan nimi telo (“ur”). toki Wije li sama toki pona. ona li jo e nimi laso (“xanh”). mute la ona li kepeken ala e nimi wan taso li kepeken e nimi tu anu nimi tu wan. laso sewi la ona li toki e ni: “xanh da trời” (laso pi selo sewi) en “xanh dương”, “xanh nước biển” (laso pi telo suli). laso kasi la ona li toki e ni: “xanh lá cây” (laso lipu)

sina la kule pi nanpa seme li lon? mi la kule luka pi toki pona li pona. taso kule kapesi li pona kin tawa mi.