loje en laso li kule sama anu seme? oko mi la, ken.

ijo pilin mute li lon insa oko. ona la, kulupu tu wan li lon. kulupu nanpa wan la, ijo li pilin e suno pi kule loje. kulupu nanpa tu la, ijo li pilin e suno pi kule laso kasi. kulupu nanpa tu wan la, ijo li pilin e suno pi kule sewi. kulupu ale li pali pona la, oko li ken pilin e kule ale. o lukin: suno jelo li kama la, kulupu loje en kulupu laso li pilin wawa e ni. kulupu pi kule sewi li pilin lili. pilin ni ale li kama wan lon insa lawa, li kama pilin pi kule jelo.

oko mi la, kulupu nanpa tu li nasa lili. ona li pilin e kule laso kasi, taso ona li pilin lili e kule loje kin. ni la, kule loje en kule laso li ken sama lon lawa mi. tenpo mute la, ni li ike ala. mi o toki e tenpo tu wan ni: mi pilin e nasa pi oko mi.

poki telo pi jan lili

mi jo e jan lili pi tenpo sike tu wan. open pi tenpo lape la, ona li wile moku e telo walo. mi o pana e telo lon insa poki, o pana tawa jan lili. poki tu li lon. nanpa wan li kule laso sewi. nanpa tu li kule ni: laso sewi en loje lili li kama wan. jan lili li olin e poki nanpa tu. taso, mi la, poki tu li kule sama. pona la, sitelen soweli li lon poki. mi lukin e soweli la, mi ken sona e poki wile.

kasi mun

sina sona ala sona e kasi ni: kasi li jo e lipu laso e lipu pi loje wawa kin. kasi ni li pona lukin. ma Elopa la, jan li esun e ona lon tenpo lete. ni li kasi mun, tan ni: lukin la, lipu ona li sama sitelen mun¹.

tenpo pini weka la, mi en jan olin li tawa ma Papuwa Nukini. ma ni la, kasi mun suli li lon. tenpo wan la, mi lon tomo tawa lon tenpo pi kama pimeja. jan olin li toki e ni: o lukin e kasi mun! pona lukin a! mi lukin. mi awen lukin. mi alasa lukin e lipu loje, taso mi ken ala. pimeja li kama la, lipu laso en lipu loje li kama sama tawa mi.

suno pi ilo lili

mi jo e ilo toki lili. ona li pali mute la, wawa ona li weka. ni la, ona li wile moku e wawa sin kepeken linja wawa. mi pana e linja wawa tawa ilo la, ilo li pana e suno lili. mi weka e linja wawa la, suno li weka kin.

tenpo wan la, jan olin mi li toki e ni: o pana e linja wawa tawa ilo mi. ilo sina li pini moku e wawa. mi toki e ni: sina sona e ni tan seme? ona li toki: suno ilo li laso. tenpo ni la, mi kama sona e ni: ilo li awen moku e wawa la, ona li pana e suno loje. ilo li pini moku la, suno li kama laso. ona li jo e kule tu a!