tomo tawa mute li lon. tomo tawa li tawa lon nasin. nasin li ken ma li ken kiwen li ken linja kiwen. tomo tawa linja li ken tawa lon linja kiwen. taso ona li ante mute!

ken la sike pi tomo tawa linja li sike pi insa kon. ken la ona li sike kiwen. sike pi insa kon? lon a! ni li nasa. suli la tomo tawa pi sike kon li ken tawa kepeken linja kiwen wan. linja kiwen ni li ken lon anpa pi tomo tawa anu lon sewi pi tomo tawa.

mute la tomo tawa linja li jo e sike kiwen. sike kiwen lili la tomo tawa linja li ken tawa lon linja sewi. jan li ken tawa sewi nena kepeken tomo tawa linja ni. taso mute la nasin li lon ma li lon sewi ala. nasin li linja kiwen tu. tomo tawa linja li tawa lon nasin ni. tomo tawa linja ni li ken suli. taso ma Tosi la ona o lili (< 740 m). ma suli la tomo tawa linja li ken suli mute. tenpo pini la lon ma Oselija la tomo tawa linja li suli mute a. ona li jo e kiwen lon insa ona. ona li kepeken tomo tawa tu tu ni: ona li tawa e tomo tawa linja kepeken wawa!

taso tomo tawa linja li ken tawa lon ma tomo kin. ma tomo la ona li suli ala. ona li ken tawa lon nasin linja. nasin linja ni li ken lon nasin pi tomo tawa! ni la tomo tawa ante li ken tawa lon nasin wan. ike la tomo tawa linja nasin li tawa lon nasin pi tomo tawa ale la tomo tawa ale li ken pakala e ona. tomo tawa ale la taso tomo tawa linja li pakala lili.

mute la tomo tawa ilo wan li tawa e kulupu pi tomo tawa. tomo tawa ilo en kulupu pi tomo tawa li tomo tawa linja. taso tomo tawa linja ante li lon. ma tomo San Pansiko (San Francisco) la tomo tawa li tawa kepeken linja. nasin ale la linja li lon anpa. tomo tawa li jo e ilo ala li tomo taso. tomo tawa li wile tawa la jan li luka e linja. linja li tawa la tomo li tawa. linja ale li kama wan lon tomo wan. tomo ni la ilo suli li lon. ona li tawa sike e linja ale.

ma pi nena mute la tomo tawa linja li ken ala tawa pona. tomo tawa linja li ken ala tawa sewi kepeken sike kiwen. ni la jan li pali e sike kiwen pi nena mute. tomo tawa li ken tawa sewi kepeken ona, ni li lon kulupu nena Alepen.

ken lili la tomo tawa linja li jo ala e sike tawa. ona li tawa kepeken nasin tu ni.

nanpa wan la ona li kepeken e kon tawa. kon li tawa anpa la tomo tawa li tawa sewi. ona li ken tawa sinpin kepeken kon anu kepeken ilo ante. ma Esalasi (Österreich) la tomo tawa linja kon li lon. ona li tawa sinpin kepeken linja. linja li tawa e ona.

nanpa tu la ona li kepeken e kiwen taki. seme li kiwen taki? kiwen taki li jo e wawa taki. wawa taki li tawa e ona. kiwen taki tu li lon la ona li tawa wan anu tawa weka. kiwen taki li lon. taso linja pi wawa ilo li ken kama taki kin! wawa ilo lon linja li ante la linja li taki. tomo tawa taki mute li lon. jan li ken tawa kepeken tomo tawa taki wan taso. tomo tawa ni li lon ma Sonko. taso sona ona li tan ma Tosi. ma Tosi la ona li pali pi nanpa wan e tomo tawa taki Tanlapi (Transrapid). tan seme la ona li lon ala ma Tosi? nasin ona li mani mute! mani la ona li ike. taso ona li tawa suli (>180 km/h) la mani la ona li pona. taso tawa lili la ona li ike.

pini la tomo tawa linja li pona mute tawa jan. tomo tawa ale la ona li pakala lili li pana lili e kon ike. o kepeken e ona! ona li musi.