tenpo pini weka la, jan ale pi kulupu Lanu li lon ma kasi li lon ma tomo mute. taso kulupu Lanu li pona ala tawa kulupu Waka. ni la, kulupu Waka li alasa weka e kulupu Lanu tan ma kasi. ni la, kulupu tu li open utala. taso, utala la, kulupu Waka li nanpa wan. ni la, kulupu Lanu li weka tan ma kasi li open lon ma tomo taso. ona li lon ala ma kasi la, ona li pilin ike li toki e ni tawa kon sewi ona: “kon sewi o! o pana e ma tawa mi mute, o weka e jan ike tan kulupu Waka”. tenpo ni la, ona li lon ma tomo mute. taso, jan lawa pi kulupu Waka li wile e ni: kulupu Lanu li lon ma tomo wan taso. ona li open e utala sin. utala ni la, kulupu Lanu li utala kepeken wawa ona ale tan ni: ona li nanpa wan ala lon utala la, ona li ken ala lon ma tomo mute. taso… taso… kulupu Waka li anpa e ona. jan lawa pi kulupu Waka li toki e ni tawa kulupu Lanu: “mi anpa e sina la, sina ken lon ma tomo wan taso. nimi pi ma tomo ni li ma tomo Noko”. jan pi kulupu Lanu li open tawa ma tomo sin ni. pona la, ma tomo Noko li sin la, jan li lon ala. kulupu Lanu li ken lon tomo ale.

ma tomo ni la, jan sin li kama lon li kama sona e ni: tenpo pini la, kulupu ona li wawa li lon ma mute. taso, tenpo lon la, ona li wawa ala li lon ma tomo wan taso. ni la, jan ni li pilin ike mute li pilin e wile wawa. kulupu pi jan lili ni la, jan meli wan li lon. nimi ona li jan Tenaka. ona li wile wawa e ni: kulupu Lanu li ken lon ma mute. tenpo pimeja wan la, ona li weka tan ma tomo Noko li tawa ma tomo ante pi kulupu Waka. jan lawa pi kulupu Waka li lon ma tomo ni. jan Tenaka li kama lon ma tomo pi kulupu Waka li lukin li kama sona e ni: ma tomo ni la, jan li pali e tomo kepeken kasi kiwen taso! tenpo kama la, jan lawa pi kulupu Waka li tawa lon ma tomo esun li esun e len sin. jan Tenaka kin li lon ma tomo ni. ona li toki e ni tawa jan lawa pi kulupu Waka: “jan lawa o! o pana e ken tawa kulupu Lanu mi!”. jan lawa li toki e ni: “a! sina ken ala lon ma tomo ni! mi pana ala e ken tawa kulupu sina la, sina pali e seme?”. jan Tenaka li toki e ni: “sina pana ala e ken tawa kulupu mi la mi utala e sina”. jan lawa li toki e ni: “utala la, mi nanpa wan. tenpo pini weka la, mama mi li anpa e sina!”. jan Tenaka li pilin e ni: “kulupu Waka o awen…”. ona li weka tan ma tomo pi kulupu Waka li tawa ma tomo Noko. ona li kama li toki e ni: “jan ale o! tenpo pini poka la, mi toki tawa jan lawa pi kulupu Waka. sina wile ala wile e ken e wawa? sina wile lawa e ma suli anu seme? sina wile e ni la, o kute e mi”. jan ale li wile e ni. ni la ona li pini pali li open kute. jan Tenaka li toki e ni: “kulupu Waka li pilin wawa mute, taso ma tomo ona la jan li pali e tomo kepeken kasi taso. mi mute li ken seli e tomo ale!”. jan li toki e ni kepeken kalama mute: “mi wile e ni! o moli e jan ale pi kulupu Waka!”.

jan Tenaka li kama jan lawa pi kulupu utala sin ni. tenpo suno kama la, kulupu utala li open tawa ma tomo pi kulupu Waka. ona li kama lon ma tomo li kama sona e ni: ma tomo la, seli li lon! kulupu utala la, jan pi mute lili li toki e ni: “pona a! mi wile ala pali. mi pilin pona tan ni: mi mute li ken lukin e ni: jan ale pi kulupu Waka li moli”. taso jan Tenaka li toki e ni: “kulupu utala o! mi lawa e sina la, o kute e mi. ma tomo ni la, seli li ken moli e jan ale. mi sona e ni: kulupu Waka li ike tawa sina, taso ona li jan sama mi mute. mi mute o pana e pali tawa ni: ona li moli ala”. ni la, kulupu utala li lanpan² e telo tan linja telo li tawa pana e telo tawa ma tomo. kulupu utala li kama lon ma tomo la, jan mute li toki e ni: “seme a? jan pi kulupu Lanu li wile ala e moli mi? nasa a”. tenpo kama lili la, seli ale li weka tan pali pi kulupu utala. taso, kulupu utala en kulupu Waka li kama sona e ni: tenpo seli la, jan lawa pi kulupu Waka li lape lon tomo ona li pali ala! jan pi kulupu tu li toki e ni: “o moli e jan lawa! ona li ike mute!”. kulupu tu li tawa tomo suli pi jan lawa li open e lupa. jan utala pi jan lawa li pilin monsuta¹ mute tan ni: ona li ken ala utala e kulupu suli ni! jan li kama lon tomo pi jan lawa li toki e ni: “sina ike a! sina o moli! o toki e toki pini sina!”. jan lawa li lukin e kulupu ni li toki e ni: “a! jan pi mani ala o! o lon ala tomo ni, sina ken jaki e ona”. toki ni li jaki mute la, jan meli wan li pana e ilo kipisi lon sijelo pi jan lawa. jan mute li lukin e ni li toki e ni kepeken kalama wawa: “wawa! jan lawa li moli!”. jan meli li pini utala la, ona ale li lukin e lawa ona: ona li jan Tenaka! jan mute li pilin e wawa tan moli pi jan lawa li toki e ni: “jan Tenaka o! sina o kama jan lawa sin!”. jan ale li toki e ni: “jan Tenaka li jan lawa sin pi kulupu Waka li jan lawa sin pi kulupu Lanu!”. jan li lanpan² e sike pi kiwen mani pi jan lawa moli li pana e ona tawa lawa pi jan Tenaka. jan Tenaka li weka tan tomo suli li tawa tomo mama tomo li toki e ni: “jan pi kulupu Waka o! mi wile kama jan lawa sina, taso kulupu Lanu o ken lon ma ale!”. jan li toki e ni: “tenpo ale la, mi mute li wile e ni, taso jan lawa pi tenpo pini li wile ala”. jan Tenaka li kama sona e ni la, ona li toki e ni: “sina pona mute a! mi ken kama jan lawa sina!”. kulupu Waka li toki e ni: “pona la jan lawa sin li sina! jan lawa ante li ike mute tawa mi a!”.

tenpo suno kama poka la, jan Tenaka li weka tan ma tomo pi kulupu Waka li tawa ma tomo Noko. ona li kama li toki e ni tawa jan ale: “o kute e mi! mi en kulupu utala li moli e jan lawa pi kulupu Waka”. kalama wawa pi pilin pona li lon. kalama li weka la, ona li awen toki: “mi kama jan lawa ona!”. jan ale pi kulupu Lanu li toki e ni: “jan Tenaka o! o kama jan lawa mi kin!”. ni la, jan Tenaka li kama jan lawa pi kulupu tu. tenpo kama la, jan mute pi kulupu Lanu li weka tan ma tomo Noko li open lon ma ante. kin la, jan mute pi kulupu Lanu en jan mute pi kulupu Waka li open olin li mama e jan sin pi kulupu tu.

taso, jan Tenaka li kama majuna⁴… kin la, sijelo ona li kama pakala. tenpo suno wan la, ona li kama ken ala weka tan supa lape li kama wile e misikeke³, taso ona li wile ala moku e ona. ona li toki e ni: “mi majuna. taso, ma ni li tawa jan sin. mi o weka tan ma ni. mi sona ala e ni: jan seme o kama jan lawa sin. mi wile taso e ni: jan sin li pona tawa lawa la, jan lawa sin li jan sin”. tenpo kama lili la, ona li moli. jan mute li kama sona e ni la ona li pana e telo tan oko ona li pilin pakala mute li ken ala pali tan ni: jan Tenaka li pona tawa ona. jan li ma e sijelo ona lon lupa suli lon ma tomo Noko. kiwen moli ona la sitelen ni li lon: “anpa pi kiwen ni la, jan Tenaka li awen. ona li lawa pona e kulupu Lanu e kulupu Waka. ona li sewi tawa kulupu tu li weka e ike lon poka ona”.

¹ jan li pilin monsuta la ona li pilin ike mute li pilin wawa ala
² jan li lanpan e ijo la jan li kama jo e ijo
³ misikeke li ken pona e sijelo li ken weka e moli
⁴ jan li majuna la ona li kama lon tenpo pini weka a