musi Tapatan li pona mute. ona li tan ma Pilipina, taso ona li jo e nimi mute li tan ma mute. nimi Tapatan li pona tan ni: ona li nimi pi kalama pona! jan lili en jan suli li ken musi e musi ni.

o pali e musi

sina wile musi la o kama jo e lipu. lipu la o sitelen e sike luka tu tu. o sitelen kin e linja. pini la o kama jo e mani sike luka tu anu sike ante. sike ni o jo e kule tu.

nasin musi

jan tu li musi. ona li utala. jan nanpa wan li pana e sike nanpa wan ona. jan nanpa tu li pana e sike nanpa wan ona. sike ale li lon lipu la sina ken tawa e sike sina. sike li ken taso tawa ma pi sike ala li ken taso tawa ma poka. sike tu wan sina li lon linja wan la sina wawa lon musi!

nasin ante

nasin mute li lon tan ni: musi li lon ma mute. ma mute la sina ken tawa e sike tawa ma pi poka ala. jan Asiwi lon ma Mewika la musi Pikalija (Picaria) li sama musi Tapatan. taso sike luka luka tu wan li lon. sike tu tu namako! ma Kana la lipu pi musi Asi (Achi) li sama musi Tapatan. taso jan li jo e sike tu tu. musi Tapatan la ona li jo taso e sike tu wan.

musi linja ni li ken suli. musi linja suli li kama lon tenpo pini mute. ona li tan ma Masu. taso mi sona ala e nimi ona. ni la mi kepeken e nimi Melelu tan toki Lasina (Merellus “musi supa”).

musi Melelu la sike mute tu tu li lon lipu. jan tu li musi. jan musi li jo e sike luka tu tu. sike mute en linja mute li lon a! jan li wile e sike tu wan lon linja wan. ni la ona li ken weka e sike tan jan ante. open la sike li ken taso tawa ma poka. jan wan li jo e sike tu wan taso la sike li ken tawa ma ale pi sike ala. jan wan li jo e sike tu taso anu li ken ala tawa kepeken sike la musi li pini.

musi ni li pona tawa sina la o musi lon poka pi jan pona.