ma sewi la ijo mute li lon. suno en mun en ijo ante li lon. mi lon ma. ma ni li jo e mun. ma ni li mun suno. taso suno mi li jo e mun mute. mun suli en mun lili en mun mun li lon. mun lili li lili mute li sike e suno.

mun lili mute li lon. taso tenpo pini la jan li sona ala e ona tan ni: ilo lukin pona li lon ala.

jan li sona e mun lili telo. jan li sona e ona tan tenpo pini mute a. suli la, mun lili Ali li lon. jan li sona e ona tan tenpo pini mute. taso tenpo pini la jan li pilin e ni: mun lili Ali li lon, jan sewi li wile pakala e ona! jan Ali li kama sona e ijo mute pi mun lili Ali. ni la ona li nimi e ona. mi sona pona e mun lili telo tan ni: ona li lon poka pi ma mi la nasin ona li suno!

mun lili kiwen la, jan Situ (Titus) li toki e ni:

mun luka tu li lon. mun li sike e suno. sina ken sona e sike mun kepeken sona nanpa. taso lupa suli li lon. lupa en sona nanpa la, mun namako o lon.

ni la jan li alasa e mun namako. jan Sa (Zach) li pali e kulupu alasa mun (toki Tosi: Himmelspolizey). kulupu alasa mun li alasa ala e mun lili nanpa wan. jan Pijasi li alasa e mun lili nanpa wan. jan Pijasi li sona e kulupu alasa mun e nasin ona la ona li sitelen e sona pi mun lili sin kepeken nasin pi kulupu alasa mun. taso sijelo pi jan Pijasi li kama ike la ona li ken pini ala e pali ona. taso jan Ka (Gauß) li pali e nasin nanpa sin. jan Olepa (Olbers) li ken alasa e mun lili kepeken nasin nanpa pi jan Ka. ona li alasa e mun lili ni: mun Sele (Ceres) en mun Pala (Palas) en mun Weta (Vesta). taso mun Weta li mun lili nanpa tu tu. jan Asin (Harding) li alasa e mun nanpa tu wan. ona li mun Juno.

tenpo kama a la jan li alasa e mun lili nanpa luka. kama la jan li alasa e mun Netun (Neptun). mun Netun li mun nanpa luka tu wan – taso tenpo pini la jan li toki e ni: ona li mun nanpa luka luka tu wan. tan seme? ona li nanpa kin e mun lili a!

jan li alasa e mun lili mute a. ni la ona li toki e ni: mun lili en mun suli li ante. ni la mun Netun li kama mun nanpa luka tu wan.

sike tu pi mun lili li lon. sike nanpa wan li lon poka pi mun suli nanpa tu tu li lon poka pi mun suli nanpa luka.

mun lili kiwen en mun lili telo li lon. mi toki e ni: ona li mun lili. taso ona li lili ala. ken la ona li suli sama jan. ken la ona li suli sama tomo. ken la ona li suli sama nena suli a!