o pilin: sina wile tawa e ijo la sina wile jo e ijo ni lon luka sina. taso ijo li suli wawa la ona li wile tawa anpa li anpa e luka sina. suli ike la ijo jo li ken pakala a e luka sina. suli pi ike mute la ijo li weka e luka tan sina. ni la o jo kepeken luka sina ala, o jo kepeken linja wawa. taso linja seme li wawa? mi wile toki e linja wawa ken wan.

pipi mute li ken pali e linja kepeken monsi ona. ona pi noka luka tu wan li ken pali e linja wawa a. ona wan li pali e linja pi wawa suli a. taso sina ken pilin ante: sina ken pakala e linja pipi kepeken wawa lili pi luka sina – seme la linja pipi li wawa?

a, linja li lili la wawa ona li lili. lili ona la pipi ona mute li ken awen lon ona li pakala ala e ona. linja ante li lili sama la pakala li kama tan pipi mute ni. taso linja pipi li awen.

linja pipi li lili seme? o lukin e lawa sina. linja li lon lawa la linja lawa li suli lon linja pipi. linja pipi li suli sama linja sina la ona li ken wawa a. sina wile moku e telo la sina pana e telo lon poki. linja li ken awen jo e poki telo e telo poki. linja sina li ken ala ni; ona li kama pakala.

mi wile suli sin e linja. o lukin e luka sina. pini luka la palisa luka li lon. pini palisa la kiwen li lon. sina lukin e kiwen tan sewi la kiwen li suli pona. sina ken lukin pona e ona. sina lukin e ona tan poka la ona li suli lili. sina awen ken lukin e ona, taso suli ona li sama ala suli pi lukin sewi. linja li kama suli sama suli kiwen poka la, seme li ken awen lon ona li pakala ala e ona? o lukin lon tomo sina. tomo sina li jo ala jo e soweli? soweli li suli mute ala la sina ken awen sewi e ona kepeken linja a. soweli tomo li suli mute la linja li kama pakala.

linja o suli sin. sina o lukin e poki lon len sina. sina jo ala jo e mani? o jo e mani wan pi sike kiwen. o pana e ona lon supa. sewi la, sina lukin e ona sike e sike ona e suli pona ona. poka la, sina ken lukin e selo ona taso e lili ona. suli pi linja pipi li sama lili pi mani sike la, linja li kama wawa a. sina wile sewi e sina e mama sina tu kepeken ona la ona li kama ala pakala. sina wile pakala e ona la o pana e mute pi kulupu sina.

suli sin la o lukin e pini luka sina. palisa luka li lon, taso sina ken tawa nasa e ona sama linja. linja pipi li suli sama linja luka ni pi tawa nasa la wawa linja li ken suli mute. linja luka sina li ken ala wawa sama: linja pipi li ken awen jo e tomo a! linja luka sina li lili la linja pipi pi suli sama li ken jo e tomo suli. linja sina li lili la linja pipi li ken jo e tomo lili.

wawa ona li pona a. ni la jan li kepeken ona anu seme? a, ona li ken ala! linja li tan pipi taso li lili taso. jan li wile sona pali e linja sama, taso ni li wile e sona sin e nasin sin. pona la, linja ante li ken wawa sama, li ken wawa suli, li tan kiwen. taso kiwen ona la linja ni li wile a tawa anpa. linja pipi li wile ala tawa pi wawa sama. pona ni pi wile tawa la jan li awen alasa e sona e nasin.