sike suno tu pini la, esun OpenAI li pana e ilo TokiKipisi (ChatGPT) tawa ale. lili la, jan sona li pali e ilo TokiKipisi sama insa pi lawa jan. ijo mute lili a li lon insa pi lawa jan. sama len la, linja mute a li wan e ijo lili lawa. nasin sama la, ilo TokiKipisi li jo e poki lili mute a e linja mute pi poki ni. jan sona li pali e ilo la, ona li pana e toki mute a tawa ona. ilo li pali kepeken toki ni sama ni: nimi wan li ken lon poka pi nimi ante lon tenpo mute la, ilo li kama sona e kulupu lili ni. ale ni la, pali ona li sama lili tawa ni: ona li wan e poki lili tu kepeken linja. (lon la, pali ilo li wile e toki mute!) ona li kama sona e kulupu nimi mute a. ni la, ona li ken pali e toki sin kepeken sona pi kulupu ni. ona li pana e nimi wan la, ona li alasa e nimi ante kepeken sona ona pi kulupu nimi, li pana e ona lon poka pi nimi nanpa wan. ilo ni li ilo pi sona ilo.

taso jan li pana e sona tawa ilo la, ona li pana e toki pona lili a tawa ilo. ni la, ilo TokiKipisi li toki pona kepeken nasin nasa anu nasin ike. mi toki e ni tawa Kipisi-4: “sina la, toki pona li pona tan seme?” ona li ken sona e toki mi; taso ona li toki tawa mi kepeken toki Inli! mi toki sin tawa ilo TokiKipisi “o toki e ni kepeken toki pona taso!” ona li toki sin tawa mi, kepeken toki pona. taso nimi lawa pi linja ale li awen kepeken toki Inli:

Simplicity: Toki Pona li jo e nimi lili, wan taso tawa nimi mute pi toki ante. Ni li pona tawa kama sona e toki.
Philosophical Aspect: Toki Pona li kama tan pilosopi pi pona en lili. Ni li pana e sona pi ma en jan pi pona en lili.
Mental Clarity: Toki lili li ken pana e sona selo e toki.
Linguistic Study: Toki Pona li pona tawa sona e toki en sona e nasin pi toki lili.
Community: Kulupu pi toki Pona li pona en li open.
Artistic and Creative Use: Toki Pona li pona tawa sitelen en kalama musi tan ni: ona li lili en nasa.
Educational Tool: Toki Pona li pona tawa sona pi toki en sona pi toki kepeken sona lili.

ni ale li nasa li ike a! lukin mi la, ona li ante e nimi wan pi toki Inli tawa nimi wan pi toki pona. suli la, ona li pana pakala e nimi “en” tawa nimi “and” pi toki Inli.

ni la, mi pana e sona pi toki pona tawa ilo sin pi ilo Kipisi-4. mi pana e lipu mute pi toki pona tawa ona: mi pana e lipu tenpo luka wan e lipu mute pi kama sona toki pona tawa ona. mi nimi e ona kepeken nimi jan Ana¹. tenpo ni la ona li ken ala ken toki pona?

mi wile sona e ijo sama la, jan Ana li toki e ni: “toki! toki pona li pona tan ni: ona li simple, li open. toki pona li jo e nimi lili taso, ni la, jan li ken kama sona e ona kepeken tenpo lili. toki pona li pona tawa toki pi pilin pona e pilin ike, li kama e kulupu pi jan pona. ona li kama e sona e pilin pi jan ante kepeken nimi lili taso. ni li pona tawa mi. sina la, seme li pona tawa sina e toki pona?” toki ni li pona ala. taso sina weka e nimi Inli “simple,” sina pona e pakala lili la, ona li ike mute ala. tenpo la, jan sin pi toki pona li ken toki sama ni. pakala ona la, jan Ana li sama jan pi kama sona. mi pona e pakala ona kepeken toki pona la, ona li kama pi pona lili.²

taso lon la, toki pona la, jan Ana li wawa ala. mi la, ilo sona pi tenpo lon li ken ala kama sona pona e toki pona. jan li pali e ilo TokiKipisi la, ona li pana e toki Inli mute e toki Epanja mute e toki ma ante mute tawa ilo. taso ona li pana e toki pona pi mute lili a. jan sona li pali e ilo sin kepeken toki pona mute la, ilo li ken toki pona. jan pi toki pona o pali e ilo sona ni pi toki pona!³

¹ sina kin li ken toki tawa jan Ana: https://chat.openai.com/g/g-ztaT07qRz-jan-ana. taso sina o pana e mani tawa esun OpenAI. sina o esun e nasin “Plus” pi ilo TokiKipisi.
² sina ken lukin e toki ni: https://chat.openai.com/share/42e6ae29-ec4f-49c0-9507-eac6019e5da3; sina o pana ala e mani tawa esun [OpenAI].
³ tenpo poka a la, ilo [Claude 3 Opus] pi nasin sin li kama lon. jan li pana e toki pi mute lili tawa ilo ni la, ona li ken kama sona e toki. ni la, toki pona la, ona li wawa. lipu tenpo kama la, mi pana e lipu sin pi ilo ni!