tenpo sike pini li sike soweli. ken la sina wile sona. mi toki e soweli tan seme a? ni li tan nasin tenpo pi ma Sonko anu seme? ala a! nasin pi ma Sonko la tenpo sike ni li tenpo akesi. tenpo sike pi toki mi li sike nanpa 2025. nasin nanpa pi toki pona la ni li sike nanpa MAML. kalama pi nimi MAML li sama nimi soweli pi toki Inli. musi lili toki a.

tenpo sike MAML li suli tawa kulupu pi toki pona. mi kulupu li pali mute a. tenpo pini poka la, sike li pini. ni la mi o toki e ijo suli ale ona!

jan li kulupu li musi lon ma. kulupu li kama lon ma Sanpansiko, lon ma Ansetan, lon ma Lanten, lon ma Sijato, lon ma Sapu kin. lipu tenpo nanpa kala la, jan Kasape li toki e tenpo kulupu pi ma Ansetan. lipu tenpo nanpa lon la, jan Ke Tami li toki e tenpo kulupu pi ma Sapu. sina lon ma Mewika anu lon ma Kanata anu lon ma Elopa la, ken suli la, sina kin li ken kama lon kulupu! mi lon ma weka li ken ala. taso mi sona e ni: jan li kama lon poka la, tenpo musi li pona e pilin ona, li wawa e wile kulupu ona.

lipu tenpo luka li kama! ni li lipu tenpo nanpa kala, nanpa kokosila, nanpa supa, nanpa pilin, nanpa lon. sike sin la nanpa len kin a li kama! lipu ale la jan li pana e toki, li alasa pona e pakala toki, li pana e sitelen, li nasin e toki e sitelen lon lipu. ni ale li wile e pali suli a! taso kulupu li awen pali, li pini ala. sike ni la mi kin li kama pana e pali mi tawa kulupu. pali ni li musi tawa mi, li pona tawa kulupu. jan ale pi toki pona li ken pana e toki e sitelen e musi e pona mute ante tawa lipu!

seme li soweli? mun #T la mi en jan Ke Tami li kama sona a! mi pali e lipu. lipu la jan li ken lukin e sitelen li ken toki e soweli e akesi e waso e kala e pipi e kasi e ante mute. lipu li wan e sona ale. tenpo mute la jan li toki e nimi ijo lon toki Inli li wile sona e ni: “a, ijo ni li seme lon toki pona?” lipu wawa pi jan Ke Tami la mi ken pana e sona kepeken pali lili a. ni li pona e kama sona!¹

sin kulupu ale li lon poki lipu sina! mun #TW la mi open e lipu sin. lipu la mi toki Inli e ale kulupu. jan li pana e toki ona, li sitelen e ijo pona, li pali e ilo pona, li toki pona e kalama la, mi ken toki e ni ale li pana e lipu tawa poki sina. tenpo ale la sina sona e sin kulupu! jan mute a li jo e lipu mi! (mute ona li LAMTW lon tenpo sitelen mi, li ken suli sin lon tenpo sina.) sina kin li ken kama jo e ona.²

kulupu pi sitelen pona li kama lon! jan sona pi sitelen pona li kama kulupu, li toki mute e nasin ilo. sina ken lukin e lipu ona. mi wile ala toki suli e kulupu tan ni: pali ona li pini ala a. taso tenpo kama la, ken la, mi anu jan ante kulupu o toki suli e ona a!³

lipu ale pona li kama lon poki wan! sike pini la mi en jan Juwan en jan Kita en jan vivi li open e pali suli. mi wile poki e lipu ale pi toki pona. tenpo lon la poki li jo e lipu LLLA.⁴

tan seme la kulupu li wile e poki pi lipu ale? lipu ale li lon poki wan la mi ken awen e toki ale lon tenpo suli. poki mute li lon la ni li ken ike. poki mute li lili la kulupu li ken weka e ona tan sona. toki pi tenpo weka li ken weka tan sona kulupu. ike a! poki li wan la jan li ken lukin e toki pini kepeken wawa lili.

lipu sin pi kama sona li pona tawa jan mute! mun #TT la mi pali e lipu Wasona. lipu ni la jan li ken kama sona toki. jan li lukin e toki lon lipu, li kute e toki, li pali musi e toki. lipu li wan e ale pona tan lipu pi jan Lentan, tan lipu pi soweli Sika, tan lipu pi mun Kekan San, li pona lili e ike lili ona. mi wile e ni: jan ale o kama sona toki kepeken lipu pona, kepeken ala lipu nasa pi tenpo pini, kepeken ala ilo ike tan jan pi toki pona ala. kulupu kin li ken pona e lipu mi!⁵

jan mute li pali e musi! mun #LW la jan Tekinowi en jan Netakin li open e utala musi. jan o pali e musi ilo o pana e ona tawa kulupu. kulupu li lukin e musi ale li nanpa e ona. musi seme li musi nanpa wan? o lukin e ale ona lon lipu! kin la sike Sapi li toki tawa jan pi pali musi. sina ken kute e toki ona lon lipu Jutu.⁶

suno pi toki pona li musi wawa! mun #LTW la mi kulupu li pana e toki musi e toki sona e kalama wawa e musi pona lon suno wan lon pimeja wan kin. tenpo sike ale la mi ni. ona li wile e pali suli. taso ona li musi suli kin tawa kulupu! wile la o lukin e ale ona.⁷

sina ken kute e kalama pi toki pona lon tenpo ale! suno pi toki pona li pini la mi pini ala e pana kalama. ni la ilo sin li kama! ilo la sina ken kute e kalama pona lon tenpo ale lon ilo Jutu lon ilo Tuwisi kin. jan Alin en ilo Sasi li pali pona e ilo!⁸

tenpo ale la kulupu li wile pona e kulupu. lon la pali suli li awen lon tenpo kama, lon sike sin. ken suli la pona sin li tawa kulupu a!

¹ https://antetokipona.infinityfreeapp.com/soweli/soweli.php
² https://sin-kulupu.pona.la/
³ https://sitelenpona.org/
⁴ https://lipu.pona.la/
⁵ https://wasona.com/
⁶ https://itch.io/jam/mu/
⁷ https://suno.pona.la/
⁸ https://kute.pona.la/