tenpo pini poka la suno sona pi selo pimeja li lon ma Pasiju a! taso nasin kulupu pi ma ale li awen toki e ni: jan pi selo pimeja li ike. suno ni la (suno ale a la) jan o sona e pakala pi nasin kulupu ni, o alasa ante e nasin kulupu. o kama sona e ni: jan pi selo pimeja li pali e pona mute mute a! kama sona o lon tan ni: kulupu li len e sona. tomo pi pana sona li… pana ala e sona ni.

tenpo pini la jan pi ma Elopa li lanpan e jan pi ma Apika, li tawa e ona tawa ma Amelika tan pali, li pana e mani ala tawa ona. jan lawa li wile len e ike ni la ona li toki e ni: jan pi ma Apika li ike. taso ni li lon ala a!

sona pona la jan ale li tan ma Apika a. ni la jan pi ma ni li ante mute li toki lon toki mute a kepeken sitelen mute. ma tomo Tunputu (Timbuktu) la jan li toki e sona mute! jan li sona li nanpa e suno e sewi, li sona e kasi misikeke, li toki e tenpo pini e nasin lawa e nanpa, li musi li kalama musi. ma Masi (Egypt) li pali e tomo suli e sitelen musi e lipu mute e sona mute.

ma Apika li jo e moku mute e toki mute e kiwen mute, li esun mute. ma Apika li jo e wawa mute a!

ma Amelika kin la sona mute li len. jan pi selo pimeja li pali e ma e tomo mute li kama jo e mani ala, li utala. utala la ona li kama wawa. ni la nasin ni li weka! taso pana sona li len e ni li toki e ni: jan lawa li weka e nasin ike aaa! taso, utala li lon ala la ike li awen.

nasin kulupu ike la suli la jan pi selo walo li kama sona pona. taso jan mute pi selo pimeja li sona pona li pali pona. o sona e pali ona!

jan Pasisa Pe (Patricia Bath!) li pali e ilo pi pona lukin. lukin sina li kama walo la ilo ona li ken pona e sina! jan Mali Selo (Marie Taylor) li wile sona e ni: tenpo wan la kasi li kama suli, tenpo ante la kasi li unpa. tan li seme? kulupu Nasa (...NASA) la jan Kaselin Sonson (Katherine Johnson) en jan ante mute pi selo pimeja li pali nanpa. jan li tawa mun a la ona li alasa e nasin tawa! tenpo ni la ilo nanpa li lon ala la jan o pali nanpa.

kin la jan pi selo pimeja li pali e kalama musi, li pali e nasin sin pi kalama musi! jan Oseta Sape (Rosetta Tharpe) en jan Son Kosen (John Coltrane) en jan Sa Pewi (Chuck Berry) en jan ante mute li ni a. kin la pali pi mani ala la jan pi selo pimeja li pali e kalama musi mute li toki e ni: tenpo pona o kama.

taso, sona pona li len taso ala. sona ike li ni kin a! ike mute pi nasin kulupu ni li len. ike wan la sona sijelo meli la open ona li len. tomo pi pana sona li toki e ni: jan Melijan Sin (Marian Sims) li open e sona sijelo meli. taso, tomo li len e ni: jan Melijan li pakala e sijelo pi jan mute pi selo pimeja. ike ante la alasa sona pi ma Taseki (Tuskegee) la sijelo pi jan mute li kama ike, li misikeke ala li moli.

kin la kulupu mute li wile ante e nasin kulupu, la jan lawa li len e ona. li pakala e ona. li moli e ona. pona la jan sona mute li lon a! ni la sina ken kama sona e ijo mute pi jan ale, e wawa e pona pi jan ale.

o weka e len sona!