lon tenpo pini pi ma Mewika la, pali ike suli wan li lon: jan pi selo walo li poki e jan pi selo pimeja, li toki e ni tawa ona: o pali. sina pali ala la, anu sina alasa tawa weka la, mi pakala e sina. jan walo li pilin e ni: ona li jo e jan pimeja, jan pimeja li ijo jo. jan pimeja li pali kepeken wawa mute mute lon tenpo suli a, lon seli wawa, la sijelo ona li kama pakala tan pali. taso ona li pini pali la, jan walo li pakala e ona. taso tenpo la, len la, jan pali li tawa weka. pali ike suli ni li lon ma seli taso pi ma Mewika, la jan pali li tawa ma lete, lon weka pali.

taso jan pi tawa weka li taso ala; jan mute pi ma lete li sona e ike suli pi pali ni, li pali e nasin len tan ma seli tawa ma lete. nasin len ni li kama nimi “nasin pi anpa ma” (toki Inli: Underground Railroad), li weka e jan mute a tan pali ike.

mute la, jan li pini e tawa ona lon nasin len lon ma tomo Kenetu (Kennett Square), lon selo pi ma Pensiwenja (Pennsylvania); selo pi ma Pensiwenja la, ma seli li pini, ma lete li open. tenpo la jan suli pi nasin len li kama kulupu lon ma tomo Kenetu, li toki e ijo pali. kin la, ma tomo Kenetu li ma tomo mi.

jan suli wan pi nasin ni li jan Ewije Taman (Harriet Tubman). open la ona li lon ma seli, li pali ike lon anpa pi jan walo. ona li kama weka tan ike, li tawa ma lete kepeken nasin pi anpa ma, taso ona li kama lon ma lete la, ona li pilin e ni: ona o tawa monsi, o weka e jan pali ante tan pali ike. ni la ona li ni; ona li kama lon kulupu pi nasin len, li tawa ma seli lon tenpo sin, li weka e jan ante mute a.

tenpo kama poka la, ma seli en ma lete li kama utala suli tan pali ike lon ma seli. lon pini pi utala suli la, jan lawa Epejan Linkon (Abraham Lincoln) pi ma lete li weka e jan pimeja ale tan pali ike. ona li ni la, nasin len li pini.

ale la, nasin pi anpa ma li weka e jan pona mute tan pali pakala ni pi moli mute. tan ni la, jan li awen pana e sona pi pali pona ona.