ma mute la len kule ma li lon. ma insa en ma tomo kin la len ma li ken lon. ma Mewika la len pi ma Mewilen en len pi ma Kaliponija en len pi ma ante li lon. ma Tosi en ma Pasiju en ma Nijon en ma ante mute li sama. ma Sonko li ma suli, taso sina alasa e len pi ma kipisi pi ma Sonko la sina ken ala lukin a. ken lukin la len ni li pali sin pi jan ante taso (sina ken lukin e len lon pi ma insa tu, mi toki e ona lon pini).

ni li tan seme? ken suli la lawa ma li wile e ni: ma o wan, ma lili o ken ala pilin pi ken taso o sewi ala tawa ma lili ante. len li ken kama e pilin ni la nasin lawa li ken ala e ni. len ma o len pi ma Sonko taso.

taso... len ni li awen lon a. tenpo mute la ona li len tawa jan, li lon tenpo wan ni taso:

tenpo sike tu tu la utala musi wan pi ma Sonko ale li lon, sama tenpo Olinpi^[1]: utala ni la kulupu pi ma lili ale li kama lon ma wan, li utala lon wawa tawa, lon musi sike, lon musi ante. kulupu mute li wan ala li utala la len mute ante li ken lon. tenpo pi open musi la, kulupu mute pi ma ante li kama lon ma supa lon tenpo poka. sinpin kulupu la jan li luka li sewi e len ma ona. kama ale li pini la len li kama lon poka lon nasin linja la sina ken lukin e len ale.

ni la seme li lon len? musi ala la ona mute li sama a. ona mute la nimi ma jelo li lon len loje taso, sama len pi ma Sonko. nasin sitelen nimi li ken ante. ona li ken sama nimi pi ilo linja, li ken sama nimi pi ilo nanpa. ona lili la kule li ante. wan la ma Sinka^[2] li kepeken len laso tan ni: nimi ona li "telo laso". ante la ma Kansu^[3] en ma Po^[4] li kepeken len jelo pi nimi loje.

kin la ma li kepeken len wan lon utala wan la len li ken ante lon utala ante. tenpo pini la ma pi kulupu jan ante li pana e nimi ante pi toki ona kin tawa len, taso nimi ni li kama weka lon utala ante, nimi pi toki Sonko taso li awen. ma Lanin^[5] la len li kule mute a lon tenpo pini, taso len li kama loje ale sama len ante. ken la lawa li wile wan e nasin la ona li sama e len.

sina ken kama pilin e ni: "len mute ni li lon la mi o kepeken ona lon tenpo ante mute anu seme?" ken suli la ni li pona ala tan ni: len ni li lon tenpo pi utala musi taso, li toki e jan ma utala taso. utala ni ala la jan li lukin ala li sona ala e len ni la len li nasa a tawa jan ale. ni la len o awen lon tenpo utala ni taso. len o awen len lon tenpo ante.

open la mi toki e len tu lon. tenpo mute ante la sina ken awen lukin e len ni. seme la ma ni li ken taso, li ken awen e len ona? len tu ni li tawa ma tomo Onkon^[6] li tawa ma tomo Omun^[7]. tenpo weka la ma Juke en ma Potuke li lawa e ona tu, la nasin lawa li ante tawa nasin pi ma Sonko. ma Sonko li kama lawa sin e ma tu la lawa li wile pana e pilin ni tawa jan ona tawa lawa ma ante: lawa sin la nasin lawa li awen sama, li awen ante tawa ma ante pi ma Sonko, jan pi ma tomo ni li lawa e ma ona. ni la len ma li lon, li lon utala musi ante mute, li lon tenpo kulupu mute, li lon tomo mute. taso, lon tomo la, len pi ma Sonko li awen sewi tawa len pi ma tomo.