akesi suli li ken wawa tawa jan. jan li lukin e kiwen moli pi akesi pi tenpo weka mute (Dinosauria) la, ona li toki insa: "akesi ni li seme tawa lukin? selo ona li len seme?" tenpo mute la, sijelo pi akesi moli la, kiwen insa li awen taso lon tenpo mute suli.

tenpo pini la, jan sona li toki: "kiwen moli ni li sama akesi, la selo li sama akesi kin! ona li jo e nena lili mute a!"

ni la, jan mute li sitelen e akesi kepeken selo ni. taso selo akesi li awen taso lon kiwen pi mute lili, li ken suli mute. tenpo sike #MALW la, jan sona li kama jo e kiwen akesi pi awen selo. akesi moli pi moku kasi (Dakota, hadrosaur) li kama kiwen la, kiwen li awen e sijelo ona e selo ona. lupa pakala li awen kin. nena pi selo ona li suli, li lili.

tenpo #LLLTWAMMMW la, jan sona li kama jo e kiwen waso (Archeopteryx). ni li awen e kiwen moli, e len waso. jan mute li toki: "a! ni li waso pi tenpo nanpa wan!" jan sona ante li lukin e kiwen ni la, ona li toki: "sijelo pi akesi ante li ken sama sijelo waso. len pi akesi ni li ken ala ken sama len waso?"

tenpo sike #LLLTTAMMMMLLLW la, jan sona li kama jo e kiwen akesi... pi len waso (Sinosauropteryx). sijelo ona li sama akesi, taso selo ona li sama waso a! akesi pi sijelo sama waso li ken a len sama waso! jan sona li kama jo e kiwen mute pi len waso kin. jan sona li ken lukin e ijo pi kule len kepeken ilo lukin pi ijo lili a. ni la, jan li sona e kule pi akesi ni. akesi waso pi luka waso tu tu (Microraptor) li pimeja. akesi Sinosauropteryx li kule sama ki­je­te­san­ta­ka­lu loje. len waso li ken lon kiwen pi ko kasi kin. tenpo sike #MALLLW la, jan sona Lida Xing li kama jo e kiwen pi ko kasi lon ma esun pi ko kasi lon ma Mijama. kiwen pi ko kasi ni li awen e linja monsi pi akesi waso, e len waso!

ni la, jan mute li sitelen e akesi ni kepeken len waso. jan sona li toki: "akesi ale a pi sijelo sama waso li len ala len waso?" tenpo ni la, jan sona li toki: ala. selo akesi li pana e seli. akesi suli li ken len waso lon ma lete tan ni: len li awen e seli. taso, akesi suli li lon ma seli la, len li jo e seli mute a! seli mute li ken moli e akesi suli. akesi lili en waso li ken len waso tan ni: kon li ken lete e akesi lili e waso. taso, akesi lili mute li ken kama suli. akesi pi ma seli li kama suli la, len li weka. taso selo akesi li ken lon ala anpa pi len waso. selo ona li len ala, sama jan, sama soweli suli.

tenpo ni la, jan li sona e ni: akesi pi tenpo weka mute li ken sama ijo mute tawa lukin. selo akesi li ken sama akesi, li ken len waso, li ken len ala.