tenpo pini mute la jan li kepeken ala e len. ona li jo e linja mute a. taso linja ni li weka tan sijelo jan. tan seme? jan li wile tawa mute la linja mute li ike. linja mute en len li seli e jan. ma seli la ni li ike. kin la pipi ike li ken awen lon linja li ken pakala e jan. linja mute li awen taso lon lawa lon lupa luka lon poka pi ijo unpa.

tenpo suli la jan li kepeken ala e len li jo ala e linja mute. taso ona li awen lon ma seli. tenpo suli li weka la ona li tawa ma ante: ma ni li lete. ma lete la jan li wile e selo namako. ni la ona li pali e len kepeken selo soweli. tenpo kama la ona li kepeken kin e kasi.

len li seli e jan. taso ona li ken e ijo ante mute! ma pi kasi suli ala la suno li suno e selo jan. ni li ken ike! suno la len li awen e selo. ijo mute a la len li ken awen e selo: jan li tawa lon ma kasi la pipi li tawa ona li wile moku e ona. pona la pipi li ken ala awen lon linja ona tan ni: ona li jo ala e linja mute. taso linja mute li lon ala la pipi li ken pakala e selo. linja kin li awen e selo. jan li jo ala e linja mute la ona li awen e selo kepeken len. pipi en soweli en kasi kiki^[1] en kiwen kiki li ken pakala e selo. len li suli a tawa pona sijelo jan.

tenpo pini la jan li alasa e soweli. tenpo alasa la jan li wile e ni: soweli li ken ala lukin e jan. ni la jan li ken kepeken e len! len li kule kasi anu kule ma la jan len li sama kasi anu ma tawa lukin soweli.

len li ilo pona tawa jan. taso ona li ilo taso ala! len li namako. namako? lon a! jan li wile namako e sijelo ona tan ni: ona li wile pana e sona ni kepeken lukin ona: mi pona lukin / mi jo e mani mute / mi suli a / mi jan lawa

mi pana e sona pi tan len. mi wile pana e sona pi pali len: tenpo pi open len la jan li jo ala e ilo mute. jan li kepeken e selo soweli. len ona li sama ala len pi tenpo ni. ona li sama lipu len suli. kin la ona li kepeken e len ni sama len lape. jan li kama pali e lupa lon len tawa lawa, li kepeken e linja. linja li awen e len lon sijelo. jan li kama kepeken kin e kasi linja e kasi. len kasi li ken pona lon seli lili lon lete lili kin. jan li wile kule e len ona la ona li kepeken e ko ma anu ko kasi. jan li wile pimeja e len la ona li seli e len.

jan mute li len e sijelo ona la len li kama suli. jan li wile len e sijelo ona tan kulupu. jan li wile ala e ni: jan ante li ken lukin e selo ale ona. jan li wile lon nasin len sama. len ala la jan li pilin apeja^[2]. jan lili li pilin ala e pilin ni. jan suli li pana e pilin ni tawa jan lili – anu jan lili li kama sona e pilin ni. ante la jan mute li pilin lili e pilin pi len ala.

pini la len li suli tawa jan: len li awen e selo. len li seli e sijelo. len li namako tawa lukin. len li pona tawa jan. len seme li pona tawa sina?