suno li sewi la len lete li lon ale. ale li walo, la pimeja lili li kama tan len. waso pimeja walo li open e tenpo alasa: sinpin sijelo li kama supa la ona li kama tawa telo lon ma walo. telo la kulupu ona li utala e kala e pipi e soweli jaki. taso ma a la ale li walo anu waso. sona ale pi waso ale la ante li lon ala…

taso ante li kama. insa telo la waso li lukin tawa sewi: kiwen walo li mu nasa, li kama pakala tawa poka ale. palisa suli li tu e sewi. ni li kala ala a: tomo jan li kama lon ma Antasika.

jan la ma Antasika li sin. seli ala en moku lili la jan li ken ala lon ona lon tenpo pini ale a! tenpo sin taso la jan li kama. ni li nasa: ma suli ante la kulupu jan li awen lon tenpo suli. taso ona ante la ma Antasika li weka mute. telo mute li lon selo, li ken kama kiwen tan lete; telo ante kin li lete moli. ni la ilo jan li ken ala kama pona lon poka ma. tenpo seme la jan nanpa wan li ni?

ken la tenpo pini suli: jan sona pi kulupu Elena li toki e nasin ma. ona la ma ale li lon sike. sona pona! taso kulupu li lon ma suli a, la ma li wile suli sama lon poka ante sike. ni la ma Antasika o lon! taso sona li ike: sama ni li wile ala; kin la ma Antasika li suli mute ala. taso nimi ma la toki Elena li mama: nasin Antasiko (Ἀνταρκτικός) li lon poka ante (Ἀντι-) tan nasin Asiko (Ἄρκτικός). jan li wile tawa nasin ni la ona o lukin e kulupu mun lon sewi. lukin jan la sijelo kulupu li sama soweli suli Ato (Ἄρκτος). poka Antasiko la ona li sona ike e ma. nasa ala: kulupu Elena li lon weka suli, li ken ala lukin a.

kulupu ante li lukin ala lukin e ma? toki wan la lukin: poka ante sike la ma lili Lalotona^[1] li lon telo seli. ona la mije lawa Tala Ale^[2] li pana e sona mama tan tenpo weka. kulupu mama li pali e ilo telo li kama lukin e ma ale. kulupu walo la mije Siwenson Simi^[3] li kute, li sitelen e ale lon toki open Mali lon toki Inli kin. lipu ona la mama li lukin e kiwen walo a. ni li ken taso lon poka pi ma Antasika!

taso jan ante la walo li kiwen ala: ma Lalotona la walo ni li nimi Te tai uka a pia, anu “telo (tai) pi ko walo (uka) sama kasi Pija (a pia^[4])”. ko telo (uka) la jan Simi li pana e kiwen telo (ice) lon toki Inli ona; ni la ko li kama kiwen! tenpo mama la kulupu Mali li jo ala e nimi tawa kiwen lete. jan mute li tawa poka walo lon tenpo sin, li lukin ala e ijo jan tan tenpo toki. ken suli la ma Antasika en kiwen walo ona li awen len tawa kulupu.

jan li toki e ni la tomo wawa a li tawa ma Antasika lon tenpo sama. open la jan esun taso li ni, li alasa e ko tan insa soweli. taso jan sona kin li kama: ma ante la jan li sona e nena e lupa, li nimi e ale… ma Antasika kin o len ala. lukin nanpa wan li lon sike #LLLTWAM la jan Papijan Pelinsasen en jan Mikali Lasale^[5] li lukin e walo taso. taso kama li awen la sona li kama: ma suli li lon anpa!

ike la ma li utala e jan. sike #LLLTWAMMMMLLLTW la tomo tawa Pelika (Belgica) li wile awen lon walo: poka ale li kama kiwen tan weka suno. pimeja li awen lon tenpo suli a! suno li tan ilo taso; moku ale li tan poki. moku sin la waso jaki taso li ken. jan li pakala lon ma lete la waso pimeja walo li awen lon len seli. pona la jan sin li sona sama waso: tomo en len o seli o wawa, la jan kin o ken awen.