mi kepeken e nimi “toki lon”. mi toki e ona la, mi wile toki e ni: kulupu lawa li toki e ni: toki ni li toki. kulupu ni li ken lawa e toki ona.

ma Posuka la, toki mute ala li lon. mute la, jan li toki taso e toki Posuka. taso toki lili ante li lon: toki Sonko (Ślōnskŏ gŏdka) en toki Kasepi (kaszëbsczi jãzëk) li lon. taso kulupu lawa pini li wile ala e ni: toki Sonko li toki lon.

tenpo pini mute la, toki Kasepi li kama toki lon. kulupu Elopa pi toki lili li lawa e nimi toki lon ma Elopa. ona li toki e ni: toki Kasepi li toki. toki Sonko li toki ala. mi la, ni li ike mute tan ni: mi toki kepeken toki Sonko, taso mi lon ala ma Sonko. ni la, mi ken toki lili kepeken toki Sonko. ni la, mi wile kama sona e ona kepeken lipu sona. taso lipu sona li lon ala tan ni: jan li kama sona ala e toki Sonko lon tomo sona. ni la, toki Sonko li toki lawa ala.

toki lawa li seme? lawa li jo e kon mute. mi en ni la, toki lawa li lon lipu, li lon tomo sona. kulupu toki li lawa e toki ni, li toki e ni: o sitelen e nimi ni kepeken nasin ni. sona toki la, jan li kepeken e nimi ni tan toki Tosi: Ausbausprache. mi la, toki ni li toki lawa. toki Sonko li toki ni ala. toki Sonko li jo e nimi mute kepeken nasin sitelen mute.

nasin sitelen suli tu li lon: Ślabikŏrzowy szrajbōnek en Steuerowy szrajbůnek. ni li nasa mute. toki pona la, nasin sitelen mute li lon kin: sitelen pona en sitelen sitelen en sitelen Lasina en sitelen ante. taso nasin ni li ante mute. nasin Sapikosowi en nasin Sojelowi li sama mute, li ante lili taso. mi wile e ni: toki Sonko li kama toki lon la, jan lili o kama sona e nasin sitelen wan taso - taso tenpo ni la, jan lili li kama sona e nasin sitelen ala, li kama sona ala e toki Sonko.

tenpo pini lili (20-03-2024) la jan li open toki lon tomo lawa pi ma Posuka e ni: toki Sonko o kama ala kama e toki lon. kulupu lawa Pise (PiS) li wile ala li wile pake^(pu) e lawa sin ni. tomo lawa tu pi ma Posuka li toki e ni: toki Sonko li toki lon! taso jan lawa Tuta (Duda) pi ma Posuka li pake e lawa sin ni. ona li toki e ni: toki Sonko li toki lon la ni li ike tawa ma Posuka. ni la, toki Sonko li toki lon ala.

mi wile e ni: toki lili ale o kama toki lon!