tenpo pini lili la jan mute pi toki pona li kulupu tan ni: jan Ke Tami li open e tenpo kulupu pi toki pona pi ma Elopa. tenpo sike tu pini la tenpo kulupu li lon ma tomo Win lon ma Eselasi li lon ma tomo Mase lon ma Netelan. tenpo sike ni la ona li lon ma tomo Pelin lon ma Tosi.

ma tomo Pelin la tenpo kulupu pi lipu tenpo li lon. jan pali mute pi lipu tenpo li kulupu lon tomo moku. jan pali ante li kama lon kulupu ni kepeken linluwi. jan mute li lon la jan li ken toki li ken anu e ijo pi lipu tenpo. o kama sona e ijo ni.

tenpo sike pini la jan ni li open e kulupu pi lawa Tosi pi lipu tenpo: jan Kekan San en jan Sonja en jan Eli en jan Alipi en jan Alonola en jan Simo en jan Ke Tami en jan Sonatan. kulupu ni la jan sin tu wan li kama: jan Kasape en waso seli en jan Simiman. ni la jan luka luka wan li lon kulupu ni pi lipu tenpo.

tenpo pini la jan Sonatan en jan Alonola li jan lawa kulupu. kulupu pi lipu tenpo li ken toki e wile ona lon tenpo kulupu. ona li toki e ni: jan lawa tu wan o lon. jan Sonatan en jan Alonola o awen lawa. jan Alipi o kama lawa kin. jan Alipi o lawa pona!

kin la jan Sonatan en jan Alonola li toki e ni: jan pali pi lipu tenpo o, sina pali pona. suli la jan ni li pali mute pona lon tenpo sike pini:

• jan Alipi li open pana e lipu tenpo tawa jan ante li toki e lipu tenpo lon linluwi.
• jan Alonola li lawa e kulupu li sitelen e sitelen li sitelen e toki tawa lipu tenpo.
• jan Juwan li pali e lipu linluwi li weka e pakala toki.
• jan Kasape li pali e selo lipu li pali e ijo mute ante.
• jan Ke Tami li sitelen pona e sitelen li sitelen kin e toki mute.
• jan Simo li sitelen e sitelen sinpin pona pi lipu tenpo.
• jan Sonatan li lawa e kulupu li sitelen e toki tawa lipu tenpo.
• jan Peja li awen e lipu linluwi.
• jan Eli li weka tan pali pi lipu tenpo. taso ona li pona kin a!

taso jan ante mute kin li pali pona e lipu tenpo. sina ale li pona kin tawa mi mute!

kin la mani mute li lon tan esun lipu. ni la mi ale li wile pana e mani ni tawa ijo pona. nanpa wan la mi pana e ona tawa pali lipu. mani ante li ken tawa ijo pona pi toki pona. taso ijo pona seme? len en lipu suli li en ijo pona mute li ken. pali en mani pi lipu tenpo la sina wile e ijo pona seme? o kama jan pali pi lipu tenpo o toki tawa mi. kulupu o awen pali pona!