ilo sona li kama la, sona suli li kama ken. sina wile sona e ijo la, sina ken toki tawa ilo sona. ni la, ilo sona li ken alasa lon kulupu suli pi ilo sona, anu ona li ken pali e sona sin. ken la, sina wile tawa tomo esun mute. sina wile sona e ni: nasin seme li ken lili e tawa sina? ilo sona li ken pali e sona ni. taso sona ale li ken ala ken? tenpo lili la, sona li ken ala…

toki nasa

ken la, tenpo pini la sina kute e toki nasa sama ni:

toki ni li lon ala.

toki ni li nasa. toki ni li lon la, toki ni o lon ala. toki ni li lon ala la, toki ni o lon. ni la, toki ni li lon ala lon? ni li sona pi ken ala. toki nasa ni li tan tenpo pini mute tan ma Elena. nimi ona li “sona pi ken ala tan ma Kisi (Κρήτη)”. toki musi pi tenpo pini mute la, jan sona Pilita (Φιλίτας ὁ Κῷος) li moli tan ni: ona li toki insa mute e toki nasa ni, li lape ala tan ni.

sona ante pi ken ala li lon. toki musi la,

akesi ike li weka e soweli lili tan soweli mama. akesi li toki tawa soweli mama: “mi kama pali e ijo kepeken soweli lili sina. sina ken sona pona e pali kama mi la, mi moku ala e soweli lili sina a!” soweli mama li toki: “sina kama moku e soweli lili”.

ni li sama: seme li kama? akesi li kama moku la, soweli mama li sona pona la, akesi li kama ala moku. akesi li kama ala moku la, sona pi soweli mama li ike la, akesi li kama moku e soweli lili a!

sona pi ken ala li musi tawa mi. mi ken pana e toki nasa ante:

jan sewi li wawa. ona la, ale li ken. ni la, ona li ken ala ken pali e kiwen pi suli ni: kiwen li suli suli suli la, jan sewi li ken ala tawa e ona.

ona li ken pali e ona la, ale li ken ala; ona li ken ala tawa e kiwen. ona li ken ala pali la – lon a! – ale li ken ala kin. taso, wawa pi jan sewi la, ale o ken…

open lipu la, sina toki e ilo sona tan seme?

sina kama sona e ni: sona li ken ken ala. tenpo sike pini nanpa 1936 la, jan Alan Tuwin (Alan Turing) li pana e sona suli. nasin pi ilo sona li ken ala pali e sona ale. ona li toki e sona ni:

ilo sona li pali la, ken li tu:
wan) ilo li pali, li pini pali
tu) ilo li awen pali lon tenpo ale, li pini lon tenpo ala
mi toki tawa ilo sona: o lukin e nasin pali pi ilo sona ante. o toki e ni tawa mi: ilo sona ante li kama ala kama pini e pali ona?

lukin la, toki ni li nasa ala, anu seme? taso, nasa li len… tan wile sona ni la, sona pi ken ala li kama. jan Alan Tuwin li toki e sona suli ni kepeken wile sona ante. ilo sona li ken sona e pini pali pi ilo ante la, seme li ken? ilo sona li ken sona e ni la, ilo nasa li kama ken. ilo nasa li pali e ni:

wan) o lukin e nasin pali pi ilo sona ante
tu) ilo sona ante li kama pini e pali ona la, o awen pali lon tenpo ale
tu wan) ilo sona ante li pini ala e pali ona la, o pini pali

ilo li nasa tan ni: sina ken toki tawa ilo ni “o lukin e nasin pali sina pi tenpo ni: sina lukin e nasin pali sina a”. sina toki e ni la, ilo nasa li pini ala pini? pini la, ona o pini ala. pini ala la, ona o pini a! lon la, ni li sona pi ken ala. tan ni la, ilo nasa ni li ken ala lon.

ken la, ilo ante sama ilo nasa li ken sona e pini pali pi ilo sona ante lon tenpo mute. ken la, ona li ken sona lon tenpo lili taso. taso mi sona e ni: ona li ken ala sona lon tenpo ale.

ni li musi taso, anu seme?

ken la sina pilin e ni: “ni ale li musi. taso ni li pona ala tawa ilo pi ma lon. wile sona mi li nasa ala la, sona ale pi wile mi li ken.” taso, wile sona li nasa ala tawa oko sina la, ona li ken len kin e sona pi ken ala.

mi la, sina sona e ni: tenpo pi mute lili la, jan ike li pali e jaki pi ilo sona. sina kama jo e jaki ni la, jaki li ken pakala e ilo sona sina. ken la, ona li weka e lipu ale sina. ken la, sina o pana e mani tawa jan ike tawa ni: sina kama jo sin e lipu sina. taso pona la, ilo pi weka jaki li lon. ilo pi weka jaki li alasa e sona ni: jaki li lon ala lon ilo sona?

jan li ike la, ona li ken wile e ni: ilo sona sina li kepeken wawa mute mute mute tawa ala. ona li kama pakala tan ni. ni la, jaki li ken awen pali lon tenpo ale kepeken ilo sona sina. ilo pi weka jaki li ken ala ken sona pona e jaki sama ni lon tenpo ale? tan sona suli pi jan Alan Tuwin la, ken ala a! ken la, ona li sona e jaki mute mute, taso ona li ken ala sona pona e jaki ale. jan li pali e ilo pi weka jaki la, ona o sona e ni: ilo ona li ken ala weka e jaki ale. ona li awen ike lili lon tenpo ale.

sona pi ken ala li ike tawa ni, li ike tawa ijo ante kin. tenpo sike 2020 la, jan li pali e sona sama tawa musi wawa nasa: kulupu (Magic: The Gathering). musi supa ni li kepeken lipu lili mute tawa utala. musi li open la, sina ken jo e lipu lili utala pi ike suli. sina wile sona e ni: mi ken ala ken anpa e jan ante kepeken lipu lili mi? ken ala la, sina wile ala utala.

ike la, ni li sona pi ken ala. ni li tan ni: musi wawa nasa: kulupu li suli suli la, jan li musi e ni la, ona li pali wawa li pali sama ilo sona. jan li musi la, ona li pali e sona pi pini musi. pali ni li kama ala kama pini? ken la, ala. ni la, sona suli pi jan Alan Tuwin la, ilo ante li ken ala sona e ni: ona li lukin e musi sina li sona e pini ona.

lipu li pana e sona tan lipu ni:

• lipu Wikipesija pi toki Inli: Philitas_of_Cos, Crocodile_dilemma, Omnipotence_paradox

• lipu pi tomo sona Kan https://www.khanacademy.org/computing/ap-computer-science-principles/algorithms-101/solving-hard-problems/a/undecidable-problems

• lipu Wesi: https://www.reddit.com/r/magicTCG/comments/bgiz6j/magic_the_gathering_is_turing_complete/