to’qIpo’na Hol pab paq chap laDlu’chu’DI’, wa’ Hol pong Daj tu’lu’: toki Sesi. Tsez ’oH DIvI’ Hol jIyweS’e’. vabDot tlhIngan Hol pong chap ghajlaw’: cheS Hol. ’ach nuq ’oH Holvam’e’?

Hol rorgh ’oHbe’chu’ cheS Hol’e’ ’ej lujatlhbe’ qogh tIq ghajbogh Ha’DIbaHmey. Hol but ’oH ’ej lujatlh wa’ Human nugh: cheSpu’. cheS Hol lujatlhDI’, HolchajvaD цезйас мец, cezyas mec joq lupong. qavqaS HuD yoSDaq Holvam lujatlh wa’netlh chorghSaD nuv. law’qu’be’. raSya’ luDab. tera’Daq potlhna’ ’oHbe’law’ Holchaj’e’, vaj qatlh loSmaH vagh Holmey tetlhDaq HolHomvam wItu’laH? ’ej qatlh HolHomvam pong ghaj je tlhIngan Hol? pelaDtaH…

jIHmo’ tu’lu’. Holtej jIH ’ej ben law’ DoyIchlanDaq HolQeD vIHaDtaHvIS, Holmey QulmeH yejHaD noyDaq jIvum. pa’ cheS Hol lutmey pab vIpojpu’. Holvam vIparHa’qu’, Dajqu’mo’ pabDaj, QIch wab Ho’DoSDaj, jatlhwI’pu’ tIghmey, lutmeychaj je. ’op chovnatlh vI’agh:

• tlhIngan Hol wab poD «Hay», «Qay», «tlhay», «qaghwI’» je ngaS.
• law’qu’ Daqmey pup ngu’bogh DIp mojaqmeyDaj. «raS bIngvo’» jatlhlu’meH, wa’ mojaq neH lo’nISlu’ (-ƛāy).
• ’ovmay ghajchugh mu’tlhegh, ’ovmayDaq mojaq tu’lu’be’, ’ach meQHam SeSorDaq tu’lu’. vaj DoyIchlan Hol, raSya’ Hol, latIyna Hol rurbe’. ’ewSIqaDIy Hol rur mIwvam.
• Daj je wot mojaqmey. qaSpu’bogh wanI’ leghchugh vay’, mojaq «-si» lo’nISlu’, ’ach wanI’vetlh leghbe’chugh ’ej De’Daj neH SovchoHchugh, mojaq «-no» lo’nISlu’. loQ tlhIngan Hol mojaqmey «-law’», «-bej» je rur.

ngugh pIj ’InternetDaq cheS Hol vIrIch ’ej vabDot loQ QonoSwIjDaq cheS Hol ghItlhmey vIqon. wI’qIypI’DIyaDaq cheS Hol bopbogh ghItlh tInqu’ vIqonta’ (yIghan!). ghaytan qabpaqDaq maja’chuq je jIH, Sonya’ lang (Sonja Lang / jan Sonja) je. qoj qaStaHvIS ’eSperanto Hol qep majeS jIH ghaH je. ’oplogh SoQ vIjatlh ’ej nuvpu’vaD cheS Hol vIQIj, vaj ghaytan ghaHvaD Dajqu’choHpu’. meqvetlhmo’ Holvam pong ngaS pab paqDaj.

tlhIngan Hol’e’, ben puS to’qIpo’na Hol pab paq mughta’ DeSDu’. ’eSperanto Hol, tlhIngan Hol je jatlhlaHchu’ ’ej to’qIpo’na Hol ghojpu’ je. pab paq Hoch mughta’mo’, cheS Hol pong mughnIS net Sov. lurDechmo’ mu’ chu’ ’ogh chenmoHwI’ ’en net chaw’be’, marq ’oqranD ghelpu’ ’ej jangba’. tugh chapbogh mu’vam chu’ ghojlu’: «cheS Hol». boQwI’ lo’lu’taHvIS tu’lu’bej. loQHa’ muHemmoH ngoDvam ’e’ vIchIDnIS.

DaH ’eSperanto Hol mu’ghom chapDaq narghpa’ «ceza lingvo» mu’, jIloSlI’.