fi'e la srasu
jo'au la sotyge'a joi la gadganzu

ni'o ki'ai .tssssssssssssssss.

lo gacri cu sakli jecu mo'u ga'orbi'o vau ga'u lo stedu be la dunra .i lo sibli cu za'o sance seja'e lonu lo vacri cu se tisna lo cmaku'a kei .ijebabo bravasxu fa dy .i kuspe lo cutne fa'a lo ri'usri jecu jgari ri jecu jai gau rinju ki'ai .tk. .i lo xunre gusni be fi lo sruri be le'e vrogai cu co'a di'i ze'i akti ca lonu sance fa zo'ei lo se cusku be lo minji be'o no'u lu .o'i to'i denpa toi .o'i sai .i bazi cecla li'u .i dy noi'a juxre cu zgasisku lo ka trotci kei loi jorne be lo nerpau be loi bitmu .i je ku'i zvafa'i lo po'o tadji be lonu kargau lo canko noi crane dy

.i lu .o'i cecla .i ci .i re .i pa li'u se cusku .i lo cladu'e savru cu se tirna dy seja'e lonu preja lo cecla tubnu ri'a lonu renro lo rivli'a marce zo'ei lo kensa kunti .i dy cu se lafti noi'a suksa jecu rinju cortu lo janco ca lonu dy tagji jgari le'e dasri .i ciblu dukse fa tu'a lo molmla seja'e lonu lo ciblu cu preja lo galtu xadba be lo dy xadni kei .ije lo tirse cu se vusyga'e .i dy cu se slabu lonu sutra leka sutybi'o kei fa'a lo po'o gapru jenaiku'i lo cnita noi'a se peisku be dy

.ibazibo co'a smaji dukse ro na'e nu vasxu fa dy .i catke ja'e lonu lo canko cu co'a kalri kei le'e batke .i lo bartu cu manku mulno ga'a dy pu'o lonu lo kanla cu mo'u frati fi nei .i lo te gusni be fi lo xunre cu co'u se ganse ca lonu dy de'a vasxu ja'e loka smaji mulno kei kei .i je masno lonu co'a zgana lo tarci poi te gusni se va'o lo manku pe lo kensa

.i ty carmi leka skari makau noi so'i mei .i lo blanu ce lo crino ce lo xunre ce lo blabi ce lo narju cu se ganse dy ca lonu catlu lo jipzi'o noi te gusni .i masno co carna fa lo marce lo se clani ja'e lonu lo pulce be fi lo brabra ke kensa canlu be'o noi sruri loi so'iki'oso'i tarci lo jvinu cu co'a ka'e se zgana .i py cu zirpu je cu sarlu te degji pe'a lo narju je lo pelxu jecu se tarmi lo gapcla dilnu poi se ke dizlo pagbu loi so'i sepli be fi lo kunti .i dy di'a vasxu jecu cusku fi no da fe lu .o'u ru'e .i segu ro drata gi lo munje cu melbi li'u

.i lo jvinu be fi je pa'o lo canko cu co'a blanu milxe bo binxo ca lo nu lo marce cu ca'o carna .i simlu le ka nenri lo galraipau be lo varxamsi be lo cnita plini sei se peisku la dunra .i ba zi bo se ja'e lo nu carna kei lo kruvi be lo blanu cu ka'e se zgana ca lo nu ro darno tarci cu co'u nei .i lo solri be le'e plini cu co'a carmi dukse te gusni lo nenri be lo marce je cu jai gau narviska'e fai dy ze'a lo nu lo kanla cu frati .i lo solri cu te gusni lo plini ja'e lo nu fendi lo sefta lo se gusni ce lo manku .i bu'u lo te gusni lo cmana cu se ctino lo clani noi tunta lo manku ku'o jecu se sruri lo crino je xunre foldi poi simlu leka ricfoi .iku'i dukse leka darno kei leka birti .i lo brabra xamsi cu piso'a si'e lo jvinu be lo sefta jecu minra lo gusni lo kanla be dy pa'o lo te sezysei be lo degji be lo pritu xance

.i suksa fa lonu xunre fa lo bartu be lo canko kei lonu lo vacri cu co'a banzu leka glare kei leka te gusni .i lo marce cu desku lo ka lo brife cu catke ce'u kei ja'e lo sance ki'ai .mmmm. .i dy co'u pencu lo bitmu noi ze'i co'a glare kei lo xance jecu krixa .i lo marce cu tutci lo nu nerkla lo varxamsi sei se peisku .i .a'o na porpi se ja'e lenu desku

.i ba ku la dunra cu co'a se xasne da ki'u lonu lo nenri be lo marce cu co'a glare .i lo sance be lonu desku cu za'o zenba leka cladu .iku'i baziku loka glare cu co'a se jdika ca lonu lo se suksa cu ka lo canko co'u se gusni fi lo glare xunre pe lo vacri .i dy catlu lo bartu jecu zgana lo xamsi noi crino joi blanu ku'o ce lo brabra ke finpe simsa noi limna ra ku'o ce lo cipni noi vofli ga'uku .i ku'i sutra lonu bancu lonu ka'e viska da poi mintu kei kei fa lo marce ca lonu farlu .i baziku lo bunre cu co'a se viska .i simlu leka lo sefta be lo plini cu derpesxu bu'u ta .iku'i bu'u lo korbi lo crino cu preja ze'u

.i sei se pensi dy se'u xanka lodu'u za'o sutyvofli .ije na akti fa lo falbu'u .i lonu pensi cu suksa loka co'u fasnu kei seja'e lonu lo marce cu janli lo sefta be lo plini kei .ije co'a nonsanji

ni'o ki'ai .tssssssssssssssss.

la dunra cu kargau lo kalgai .i lo se gusni cu dilnu lo danmo be lo spofu pagbu be lo marce jecu sirji lo fenra be lo galraipau be lo marce .i lo tubnu poi pu si'au trixe lo stizu cu ca cpana lo tuple be dy jecu se sance lo sibli .i dy jgari lo ri'usri jecu troci co jai gau co'u sruri .iku'i mutce leka nandu kei .ibabo snada pu'o lonu troci co sanli lo cnita pagbu be lo nenri be lo marce .ije catke lo vrogai noi galtu jecu se fenra .i ba'o lonu ze'a troci kei dy cpare to'o lo galraipau be lo marce jecu farlu lo pritu .i dy ze'i cfipu pu'o lonu co'a sanji lodu'u lo marce cu vreta lo loldi .i caku co'a sanji lo ji'a nu mutce cortu fa lo stedu

.i dy co'a catlu lo sruri jecu manci .i lo marce cu jai bu'u fenra fai lo caxno fi'o sruri lo rictu'a noi salpo jepoi cpana lo cmana .i co'a tirna lonu farlu fa lo djacu kei jecu klama lo krasi .ijebabo jvinu lo ma'arbi'i noi jai bu'u lo brabra rictu'a pe loka crino joi pelxu kei .ije ke'a se rirxe lo muvzva je slilu .i dy catlu lo gapru jecu zgana lo zirpu je blanu je narju tsani ca lonu loi re solri cu canci ti'a lo cmana .i gapru dy zi co'aku se ga'a je fa lonu damba .i so'i crino ja xunre te gusni cu muvdu ca lonu lo kesyblo cu renro lo glare .i bazibo lo brabra te gusni cu co'a zvati ca lonu lo kesyblo cu spoja .i dy jinvi lodu'u ri me dy moi loi dy damba marce .i pacna lodu'u ro lo pendo pe le'e marce cu snura

.i pu'o lonu gleki lonu catlu lo jvinu kei kei dy co'a pilno lo cradi lonu sajgau loi dy damba lodu'u makau stuzi lonu janli

fa'o