lipu tenpo li jo e lipu Patreon! o kama sona e ni!

lipu tenpo logo

lipu tenpo

nimi pi ilo kalama

jan jan Alonola tenpo 2024-03-20 lipu nanpa kalama sona sona

mi musi lon kulupu pi kalama musi. kulupu ni la, jan mute li kalama kepeken ilo ante mute. mute la, mi pilin e ni: nimi pi ilo ni li seme? ni la, mi wile alasa e nimi ona. nanpa wan la, ilo kalama li ante tan ni: ona li kalama kepeken nasin ante. suli la, nasin tu tu ni li lon:

nasin nanpa wan la, ilo li kalama tan kon. sina pana e kon tawa ilo la, ona li kalama. sina ken ante e kalama kepeken nasin mute. suli la, sina ken open anu pini e lupa. ilo kalama ni li ilo kalama kon.

drawing of brass horn

tan jan Alonola

nasin nanpa tu la, ilo li kalama tan linja. sina tawa e linja kepeken palisa anu luka anu ilo ante la, ona li kalama. sina ken ante a kalama kepeken nasin mute. sina ken lili e linja kepeken luka sina. ilo kalama supa pi palisa walo pimeja (ilo Pijano) li tawa e linja kepeken ilo palisa. sina ken ala ante e kalama pi linja wan. taso sina ken kepeken e linja ante. a linja mute li lon. ilo kalama ni li ilo kalama linja.

nasin nanpa tu wan la, ilo li kalama tan sijelo. sina luka wawa e ilo la, sijelo ona li kalama. sina ken ante lili e kalama pi ilo ni. ni la, ilo wan li ken kalama mute. sijelo ona li ate mute a. ona li sike anu poki anu lipu. ilo kalama ni li ilo kalama sijelo.

drawing of xylophone

tan jan Alonola

nasin nanpa tu tu la, ilo li kalama tan wawa ilo. ken la, sina sona e nimi pika. ona li wawa ilo. ilo kalama ni li sin mute. ilo mute li ken kalama kepeken nasin nanpa wan anu nasin nanpa tu la, sina ken suli e kalama kepeken wawa ilo. taso ilo nasa pi wawa ilo taso li lon kin. ilo Selemin (theremin) li kepeken wawa ilo taso. ilo kalama ni li ilo kalama wawa.

drawing of harp

tan jan Alonola

ale la, ilo kon en ilo linja en ilo sijelo en ilo wawa li lon. ken la, ilo ante li lon, taso mi sona ala e ona. kulupu musi mi li kulupu musi Sinponi. ilo ona li ante lili. kulupu ilo tu tu li lon: ilo kon kiwen, ilo kon kasi, ilo linja, ilo sijelo. ilo kon kiwen en ilo kon kasi li lon tan ni: sijelo ona li kiwen anu kasi kiwen.

sijelo pi ilo kalama li suli anu lili. suli tu tu li lon. mi wile toki ala e “lili mute”, ni la mi kepeken e nimi sin “meso”. ijo meso li suli ala, li lili ala, li lon insa ona. suli tu tu li ni: lili, meso, suli, suli suli. ilo li suli la, ona li kalama anpa. ilo li lili la, ona li kalama sewi. o lukin e sitelen. ona la, mi pana e nimi ale, e ma ona lon kulupu musi Sinponi.

suli sijelo taso li pona ala tawa ilo kalama. ilo kon kasi la, ilo meso en ilo suli li ante mute ala. sijelo ilo tu li sama mute. ilo meso li ken kalama sewi, li ken kalama anpa. ilo suli li ken ala ni, li ken kalama anpa lili, li ken kalama sewi lili. taso nimi o lon. ni la, ilo Opo (hautbois, oboe) li ilo suli; ilo Kalineto (clarinetto) li ilo meso.

ilo kon kiwen la, suli li nasa kin. ilo lili en ilo meso en ilo suli li sama lili. taso suli ona li ante. ilo sike li nasa, li ken kalama mute. sijelo ona li sike, li sama ala ilo ante. ona li ken kalama anpa, li ken kalama sewi. ni la, mi nimi (pi) “ilo sike” e ona.

diagram of instrument categories

tan jan Alonola

ilo linja li nasa lili. mi musi e ilo linja lili, e ilo linja meso. ona tu li sama mute, li jo e linja tu tu. ona tu li jo e linja tu wan sama. ilo lili li jo e linja sewi namako. ilo meso li jo e linja anpa namako. sina musi e ona tu lon poka lawa sina. ante la, sina musi e ilo suli, e ilo suli suli lon poka sijelo sina. ilo suli tu li jo e linja tu tu kin. linja ni li suli, li pana e kalama (pi) anpa a.

ilo ante li lon. ona kin li lon kulupu musi Sinponi. mute la, ilo ante ni li ilo linja suli. kulupu la, ona wan taso li lon. ona li ilo Pijano anu ilo pi linja mute. seme li ilo pi linja mute? ona li jo e linja mute a. taso sina luka e palisa ona ala, e linja ona.

ilo ante mute li lon. nimi ona mute li lon. kama la, mi toki e ona.