lipu tenpo li jo e lipu Patreon! o kama sona e ni!

lipu tenpo logo

lipu tenpo

lipu sin tan jan Sonja

jan jan Ke Tami tenpo 2024-03-20 lipu nanpa kalama kulupu kulupu

ijo sin pona li kama tan jan Sonja: jan Osu pi wawa nasa. ona li pali e lipu sin. lipu li kepeken sitelen pona la mi pilin pona. mi esun e ona. suwi. musi. pona.

tenpo pini suli weka la jan Pan Po li pali e lipu tawa jan lili. lipu la meli lili li kama lon ma nasa namako li wile tawa tomo ona li kama lon poka pi jan nasa pona. tenpo pi suli ala la mi lukin e lipu ni pi toki Inli. ona li musi, taso ona li suli kin. jan Sonja li lili e lipu li toki pona e ijo ale. ona li awen pona e ale lipu li lili suwi kin e ale. mi lukin e ale pi lipu sin lili kepeken tenpo lili a.

drawing of several figures walking down a road, illustrating the su book

tan jan Ke Tami

pona lipu li wawa. kute la jan Sonja li wile pali e lipu mute kepeken nasin sama: sitelen kule li pona lon insa lipu li lon poka pi toki musi pona. lipu kama wan anu lipu kama tu li jo e pona pi suli sama la mi wile pana e mani tawa lipu pi jan Sonja.

ike lili li kama tan kulupu esun Amasen. kulupu ni li lawa e pali lipu. tan ni la ona li ken e lipu pali lon nasin toki ale ala. kulupu li sona ala e toki pona la lipu o kepeken toki pi sona ona. ni la wan toki li pini la jan Sonja li pana e ona sama kepeken toki Inli kin. taso ike lili ni li ken pona suli kin. a lipu mute li kama tan toki ante tawa toki pona. taso tenpo ala anu sama la lipu li kama tan toki pona tawa toki ante. taso jan Sonja li ni. jan li kama sona toki la lipu ni li ken wawa e sona ona.

ijo wan li suwi mute tawa mi: sitelen kule insa li wawa a. jan li lukin e selo lipu taso la ona li kama sona e kule lili taso. kule insa li wawa suli: mi pana e lipu tawa poka tomo wan la mi tawa poka tomo ante la mi awen ken pilin a e wawa kule.