tenpo sin¹ la kulupu li toki pona lon ma Ite · ona li lon ma Netelan · jan Aje en jan Jonatan en jan Kasape en jan Pensa en jan Simiman li lon ona li toki pona ·

kama² la mi tawa tomo kalama · lon ona la ilo mute li ken kalama · ilo ni li moku e lipu suli · lipu li jo e lupa · ilo li kama moku e lupa la ona li kalama · lipu li jo pona e lupa la tan ilo la kalama pona li kama ·

mi kin li ken pali e lipu kalama · tomo li jo e lipu e palisa · jan li palisa e lipu la lupa lili li kama lon ona · kepeken ni la mi pali e lipu · mi pana e ona tawa ilo la ona li kalama · jan Pensa li pali e kalama ‹kulupu jan tenpo› · jan Kasape li pali e kalama ‹pipi li tawa kasi› · kin jan Aje li sitelen e sitelen suwi lon monsi lipu ·

kulupu li kama tan tomo kalama li kama tawa tomo lipu · lon ona la mi pali e pali musi · ona li seme ·

jan ali li jo e lipu · ona li sitelen e sitelen lon lipu · jan ali li pana e lipu ona tawa poka ona · ni la jan li oko e sitelen pi jan poka · ona li toki pona e sitelen ni li monsi e sitelen li pana e lipu tawa poka · ni la jan poka li oko e toki taso · ona o sitelen e sitelen tan toki ni o monsi e toki · ona li pana e lipu tawa poka · jan poka li oko e sitelen taso li toki pona e ona · mi ni awen ·

lipu li sike lon kulupu la sitelen ali monsi li kama sinpin · ni la jan ali li oko e kama · sitelen en toki li kama ante a · ni li musi · kama la soweli suli · pini la akesi suli · kama la tomo li jo e lupa · pini la jan mute li pakala e tomo suli kepeken kiwen wawa · mi oko e sitelen ali · ona li musi · mi pilin pona tan ona ·

suno li kama lape la kulupu li kama pakala · jan Aje en jan Pensa li kama tan kulupu · jan san³ awen li moku e pan pona li pali e pali musi ante · ona li seme ·

sitelen mute li lon supa · ona ali li wile anu wile ala · jan wan taso li sona e ni : sitelen seme li wile · ona li toki e sitelen mute wile kepeken nimi lili tawa kulupu · tan toki lili ni la kulupu o toki e sitelen · kulupu li toki e sitelen wile la ona li kama weka · pini la sitelen ali wile o weka en sitelen pi wile ala o awen ·

mi ni ali pi toki pona taso · ni li musi suli · mi pilin pona tan ni ·

¹ tenpo pini lili
² open
³ tu wan