ma mute lon ma Asija (ma Sonko, ma Wije, ma Anku, ma Nijon) la tenpo sike sin li lon suno nanpa mute luka tu tu (29) pi tenpo sike (2025) ni. ma Sonko en ma poka la jan li nanpa ala e tenpo sike li pana e nimi tawa ona – sama lipu tenpo a. nimi tu li lon li nimi soweli li nimi ijo. soweli luka tu tu en ijo luka li lon. soweli li ni: soweli lili, soweli mani, soweli loje pimeja, soweli lili pi kute suli, akesi seli, akesi linja, soweli pi tawa monsi, soweli len, soweli jan, waso, soweli tomo alasa, soweli loje walo. ijo luka li ni: kasi, seli, ma, kiwen, telo. tenpo sike ni li sike pi akesi linja kasi.

tenpo seli li kama sin la tenpo sike sin li lon. ni la musi pi sike sin li jo e nimi ni: musi pi tenpo seli kama. ma Elopa en ma Amelika la tenpo sike li ante. ma ni la jan li kepeken e nasin tenpo pi sike suno. ma pi nasin sewi Isilan la jan li kepeken e nasin tenpo pi sike mun. ma mute pi ma Asija la jan li kepeken e nasin tenpo pi ijo tu ni: mun en suno.

ma Sonko la musi ni li musi suli tawa jan. kulupu mama li kulupu li musi lon tenpo ni. tenpo pini pi sike sin la jan li weka e jaki ale tan tomo ona li pana e ijo loje a tan ni: pilin ona la loje li pana e musi e mani tawa ona. kin la jan li sin e ijo mute: jan li sin e len ona e linja ona. jan li pana e moku tawa jan sewi pi tomo moku tan ni: jan sewi pi tomo moku (灶君 Zào Jūn) li tawa jan sewi suli (玉帝 Yù Dì) li toki e ijo pona e ijo ike. ona li moku e moku suwi la ona li toki taso e ijo pona tawa jan sewi suli. ni li pona tawa jan.

tenpo suno pini la jan li moku mute. ona li moku e kala kin li pini ala moku e kala tan ni: nimi ‘kala’ li sama nimi ‘jo’ kin (yú 魚 kala, yú 餘 jo kin). jan li pana e lipu loje tawa jan lili. mani li lon lipu loje ni. suno sin li kama la jan li weka tan tomo li seli e ma sewi kepeken nasin ni: jan li seli e ilo pi tawa sewi. ko pimeja li lon insa ona. ona li sewi la ona li pakala suli li kalama suli li sama suno lili.

jan li kalama mute kepeken ilo pi tawa sewi tan seme? ilo suno loje en lipu loje mute li lon tan seme? tenpo pini mute la jan li toki e ni: suno nanpa wan pi sike sin la soweli wawa ike li kama li wile pakala e jan. nimi ona li monsuta¹ pi tenpo sike sin (年獸 Niánshòu). kalama en loje en jelo li ike tawa monsuta. ante la tawa musi pi soweli wawa li lon. jan li tawa musi lon insa pi len soweli. tawa musi ni li pona mute tawa jan.

ijo mute ante li lon. ma mute li lon la tenpo musi ni li ante mute a. ken la sina wile kin pana e moku suwi tawa jan sewi pi tomo moku. o musi! tenpo sike pona tawa sina!

¹ monsuta li soweli ike li wile pakala e jan