o oko e kon · ken la sina oko e waso anu pipi · o oko e ma · ken la sina oko e soweli anu akesi · o oko e telo · ken la sina oko e kala anu kasi ·

taso sina oko ala e ijo mute · kon en ma en telo li jo e pipi lili a e soweli lili a e kala lili a · ona ali li mute nasa · jan li pali la ona li oko ala e ona · taso pipi mute en kala mute li moku e ona li wawa tan ona ·

lon ma Netelan la lon ma lili Ansetan la lon suno nanpa mute luka pi mun nanpa wan pi sike ni la jan Ana en jan Jonatan en mi Kasape en soweli Kate en jan Ke Tami en jan Mateja en jan Panan en jan Simiman li kama kulupu li tawa tomo sona li kama sona e ijo lili ni mute ·

ona li mute suli li ante suli · mi oko e ona kepeken ilo wawa anu oko jan taso · ona li moku e suno · ona ante li tawa nasa e ona kepeken linja · ona ante li ken lete suli li kama ala moli · ijo ni li sama ala a jan · sona mute ona li musi a ·

suno li weka la mi moku e poki Poki · ona ali li jo e pan e kasi e telo e waso anu soweli anu kala anu ala ·

moku li weka la kulupu li kama kipisi · mi Kasape en jan Ke Tami en jan Panan li tawa tomo kepeken poki li toki lon poki · jan ante li lon poki sama li kute e toki mi lon tenpo suli · mi pini toki la ona li toki Inli e ni tawa mi : ‹mi wile sona e ijo sina · ni li pona ala pona› · ni la mi toki Netelan e ni tawa ona : ‹pona a› · ni la lon tenpo lili la ona li toki ala li sama kiwen · musi a · ken suli la ona li isipin e ni : mi ali li tan ma weka li ken ala toki Netelan ·

ni la kepeken toki Netelan la mi en jan Panan li toki e ni tawa ona : toki pona li seme · mi tu li toki la jan kute li toki e ni : toki pona li musi · jan ante kin li kute li toki e ni : lon kalama la toki pona li sama toki Intonesija · mi toki mute · mi pilin pona · musi la kulupu pi toki pona li weka la mi awen toki e toki pona · taso lon kulupu sin ·