mi lon ma. mi sona pona e ma li pali lon ma. ona li pona tawa mi. taso telo suli li ante. ona li pimeja li monsuta tawa mi.

jan pona mi li jo e tomo tawa telo li tawa telo suli. ona li kama jo e kala tan telo li pana e ona tawa mi. ona li pana la ona li awen lon tomo mi lon tenpo pimeja. mi tu li toki mute li moku e kala. taso tenpo pimeja ni la ona li jo e kala ala. toki ona li monsuta e mi…

jan pona mi li tawa telo suli kepeken tomo tawa telo ona. open la kon sewi li pona. telo li pona kin. kala mute li lon telo. jan li kama jo e kala mute li pana e ona lon supa pi tomo tawa ona.

taso telo li open tawa wawa. kon li awen li tawa ala. telo li tawa tan seme? jan li sona ala! ona li open pilin monsuta. tenpo lili kama la telo li sama nena li tawa anpa li tawa sewi. jan li ken ala lukin mute tan ni: nena telo li sama sinpin pimeja suli lon poka ale. ona li luka wawa e palisa pi tomo ona li awen.

jan li kute e mu. mu li sama kalama suli pi soweli mute. tenpo ni la ijo li lon sinpin telo. seme li ni? ijo li sama linja suli li tawa lon telo pimeja. ona li kama tan telo. ijo linja li jo e lawa. lawa ona li suli sama tomo sewi. oko ona li suli sama jan. uta ona li lupa pimeja li suli sama tomo tawa telo. sijelo ona li suli sama nasin telo li lon insa telo pimeja. monsuta li lon telo! monsuta li lukin li alasa moku e tomo tawa telo!

jan pona mi li tawa kepeken tenpo lili li lanpan e kala ona tan supa. wawa mute la ona li pana kon e kala mute tawa monsuta. monsuta o moku e kala o moku ala e tomo!

taso monsuta li mu li utala e tomo kepeken sijelo linja ona. palisa tomo li pakala. jan li ken ala awen lon palisa li anpa. lawa monsuta li kama suli li moku e ali tomo. jan li anpa lon uta monsuta.

ale li pimeja. jan li lon insa uta. ona li lukin ala li wile pilin. pilin nena li sama soweli moli. pilin luka li sama ko nasa. pilin kute li sama kon tawa. ale li monsuta. jan li pilin lili li pilin moli. ona o seme?

ona li lukin ala li pilin ala li pilin insa. ona li pilin insa e ni: mi wile ala moli! mi wawa! mi ken weka tan monsuta! taso nasin weka li seme?

jan li open kute sin. kon tawa li awen lon. kon li lon la nasin weka li lon kin! jan li kepeken wawa ale ona li tawa nasin pi kalama kon. ona li tawa sinpin li pakala e lawa ona lon sinpin. jan li pilin e sinpin kepeken luka. sinpin li kiwen. ona li kiwen uta monsuta. jan li pilin e ni: mi o awen lon ni la mi ken weka tan uta. monsuta li open tawa wawa li sewi li anpa e jan li suli e uta ona. telo li kama tan poka ale li sewi e jan. ale li pimeja. tawa li wawa. pilin ale li weka.

tenpo suli kama la jan li open pilin sin. ona li pilin e ko lon sijelo. ona li kute e waso. ona li lukin e kon sewi laso. jan li kama sona e ni: telo li tawa e ona tawa ma. tomo tawa telo li weka. taso jan li moli ala tan monsuta li pona…

ni li toki monsuta pi jan pona mi. ona li lon ala lon? mi sona ala. taso mi sona e ni: mi o tawa ala telo o awen lon ma!