nasin sewi Puta la jan li pana e kala tawa telo suli. tan seme? ma mute pi ma Asija la kala li suli tawa jan. ma Sonko la nimi kala li sama nimi ante (o lukin e toki mi “tenpo sike sin li lon ma Asija”). kala Liju (鲤鱼 lǐyú) li suli a tawa jan. toki sin ala la kala li wile tawa sewi lon nasin telo. ona li tawa lupa pi akesi seli la ona li kama akesi seli! jan li toki e ni: kala Liju li tawa sewi pi lupa akesi seli (鲤跃龙门). kon ona li ni: jan li pali mute a la ona li kama wawa a.

ma Nijon en ma Sonko la kala Nisikiko (錦鯉 nishikigoi) li suli kin. musi la ona li kala Liju tomo. kon ona li wawa. ken la sina sona e toki ni: yīn yáng 陰陽. ona li sama ni: pona en ike. suli en lili. sewi en anpa. walo en pimeja. sitelen pi sin ala la kala Niskiko li sama ona.

nasin sewi Puta la jan pi nasin sewi li moku ala e kala e soweli. jan pi nasin sewi ala li ken moku e kala e soweli. nasin sewi Puta la soweli en kala pi mute lili li ken tawa li weka tan poki jan. ma Wije la jan li pana e kala tu anu tu wan tawa telo suli tan nasin sewi Puta ala. ona li pana e kala tan ni: nasin sewi ona la jan sewi li kama lon ma tan sewi li lukin e jan. ona li wile tawa sewi la ona li kepeken e kala. lon a! jan sewi li tawa sewi kepeken … kala! musi a!