tenpo wan la mi noka lon nasin wan lon poka telo nasin wan. lon ma, lon poka telo la, kala suli wan li awen. li tawa ala. mi kama poka. lukin e ona. uta ona li open lili. moli.

mi pilin utala. kala li moli tan seme a? jan li utala e ona tan musi taso anu seme? jan alasa li sona ala sona e ken kala?

jan mute li sona ala e ken kala. kala li ken ala toki la, ona li ken ala toki e ken ona. ni la, nasin seme la mi ken sona e ken kala?

jan pi alasa sona li kama esun e kala mute. jan li kulupu tu e kala. li lape e kala ale. kulupu kala wan la, jan li pana e telo ike lon insa selo pi uta kala. kulupu kala nanpa tu la, jan li pana e telo pi ike ala. lape kala li pini la, kala li seme? kala pi telo ike li tawa nasa, li uta e sinpin pi poki telo. ijo sin li kama lon insa poki telo ona la, ona li lukin ala e ona, li awen lon. kala pi kulupu ante li tawa pona. ijo sin li kama lon insa poki telo la, ona li weka tan ona. tan ni la mi ken sona: kala li ken pilin pakala.¹

lon. taso: kala li ken ala ken sona e ona kala?

jan pi alasa sona li kama esun e kala mute. jan li pana e ilo supa pi sitelen sama lon insa poki telo. open la kala li wile utala e sitelen ona. tenpo suno ante la ona li kama sona e ni: "nnn pali ale pi kala ante li sama a mi". tenpo poka la ona li utala ala, li lukin taso e sitelen ona. ni la, jan li lape e kala. lape la, jan li kule lili e selo anpa kala. lape kala li pini la, kala li seme? kepeken ilo pi sitelen sama la, kala li kama lukin e kule nasa lon selo ona. kala li alasa weka e ona kepeken kiwen. tan ni la mi ken sona: kala li ken sona e ona.²

taso... kala li ken ala ken olin e kala ante? ona li ken.³

kala li ken ala ken kama sona? ona li ken.⁴

kala li ken mute kin: li ken nanpa⁴ li ken sona ma⁴ li ken musi⁵ li ken tonsi kin!⁶

kala li wawa. kala li pona.

wawa kala la, pona ona la, o moli ala e ona kala. o moku ala e kala pona.

¹ kala li ken pilin pakala ² kala li ken sona e ona ³ kala li ken olin e kala ⁴ kala li ken ijo ante mute ⁵ kala li ken musi ⁶ kala li ken tonsi