sike ni la jan alasa pi ma ale li kama kulupu lon ma Potuke. ni li kulupu alasa Mu (Moot) pi ma ale. ni li suli a tawa mi tan ni: mi kin li jan alasa li kama lon kulupu ni. taso nanpa wan la jan alasa li seme a?

jan alasa li alasa e seme?

jan alasa ni li alasa ala e soweli – ona li alasa e nasin pona. suli la, ona li jan pi kulupu alasa. kulupu alasa li kulupu pi jan lili li lon ma ale. lon kulupu la jan li ken sona e jan alasa ante li ken kama sona e ijo mute. tomo sona li pana ala e sona sama: kulupu ni la jan li kama sona e sona lon e sona pi lipu ala.

jan mute li sona e ni: jan alasa li tawa mute lon noka li lape lon tomo len lon ma kasi. taso, jan alasa li pali e ijo mute a ante. ona li pali pona tawa ijo mute. ona li musi li pali kulupu li kama sona e nasin pona.

jan mute a li jan alasa – jan lili 57,000,000 li lon kulupu. kin la jan majuna 5,000,000 li lon kulupu li pali tawa jan lili. ni li kulupu suli a! jan suli mute li jan alasa – ken la sina jan alasa kin!

kulupu Mu li seme?

kulupu Mu la jan majuna taso li ken lon. ni li suli a tan ni: tenpo mute la kulupu alasa li pali tawa jan lili. taso tenpo ni la jan majuna li ken musi kin!. tenpo sike ante la kulupu li lon ma ante. kulupu Mu pi ma Potuke la, jan 5000 li lon.

kulupu la jan alasa pi ma ante li ken kama sona e jan alasa ante e nasin alasa ante li ken toki li ken pali kulupu li ken kama sona e ni: jan alasa pi ma ante li seme?

mi seme lon tenpo kulupu?

open pi tenpo kulupu la kulupu ale li lon ma wan li musi. musi li pini la kulupu li kama kulupu lili mute a. kulupu lili la jan luka luka taso li lon – jan ni li ken kama tan ma mute a. kulupu lili ale li tawa ma ante lon ma Potuke li kama sona e ma Potuke. ona li ni lon tenpo suno luka. ni li pini la kulupu lili ale li kama kulupu wan li lape lon ma kasi. ona li lape lon ma kasi lon tenpo suno luka. pini la kulupu li musi sama open.

ni li suli tan seme?

ona li suli tan ni: jan mute a pi ma mute a li kama wan. ona ale li lape kulupu, li moku kulupu, li pali kulupu. tenpo mute a la ni li ken ala tan ijo mute. taso, kulupu alasa li ken e ni.