toki pona o lon ala nasin Juniko
ilo nanpa ali li ken ala jo e sitelen · jo ali ona li nanpa · ni la jan li wile sitelen lon ilo la nasin o ante e sitelen ali tawa nanpa o ante e nanpa ni tawa sitelen ni · ilo ali li sin la jan mute li pali e nasin ni ante · ona mute li jo e sitelen ante li jo e ona lon nanpa ante · ni li ike · a¹ ilo tu li kepeken nasin ante la ona li ken ala toki tawa ona ·
ni la nasin Juniko² li kama lon · ona li wan taso li sama lon ilo ali li jo e sitelen mute pi nasin mute · ni la jan li sitelen lon ilo la ona li pana e sitelen ni tawa ilo pi jan ante la jan ante ni li oko e sitelen ni sama · ni li wawa ·
kulupu pi toki pona li wile sitelen pona kepeken ilo · taso ona li wile e ni kin : jan ali li ni sama · ni la ona li toki e ni tawa kulupu pi nasin Juniko : sitelen pona o lon nasin Juniko · taso kulupu Juniko li wile e ni ala ·
mi kin · sitelen pona li lon nasin Juniko la mi pilin ike · taso ona li kama ala lon · a kulupu pi toki pona li wile e wile pi ken ala · mi toki san³ e ni ali ·
nasin seme
kulupu Juniko li wile ala lon e sitelen pona · ni la kulupu pi toki pona li ken seme · ona li ken lon e sitelen pona lon nanpa pi jo ala · a nanpa mute pi nasin Juniko li jo ala e sitelen · jan li ken kepeken nanpa ni tawa wile ona ali · taso jan li wile toki lon kulupu la nasin ona o wan taso sama nasin Juniko ·
pona la jan Mako⁴ li pali e nasin Kosu⁵ · jan li pali e nasin sitelen sin la jan lili taso li kepeken ona la kulupu Juniko li wile ala lon e ona · taso kulupu Kosu a li ken ni · ni li pona tawa kulupu mute · taso jan Mako li pali e pali ante kin · ona li wile lon e nasin sitelen pi kulupu lili lon nasin Juniko⁶ · ni la nasin sitelen ni li kama ala moli · tawa ni la lon ma la jan Mako li alasa e sona mute pi nasin mute ni · taso ona li alasa mute la ona li ken ala lon e sitelen lon nasin Kosu ·
ni la nasin sitelen sin ali li tawa nasin Ukosu⁷ a · ona li jo e nasin sitelen mute sama nasin Kosu · taso ona ali li lape · jan Mako li pini alasa la ona li kama ken lon e nasin lape ni lon nasin Kosu · taso ona li awen alasa · ni la kulupu pi toki pona li lon e sitelen pona ali lon nasin Ukosu ·
kulupu pi toki pona li kepeken nasin ni lon tenpo suli · taso ona li awen wile kepeken nasin Juniko · jan Mako li pali e pali suli li alasa tawa kulupu pi wawa ala li wile lon e sitelen pi kulupu ni lon nasin Juniko · taso kulupu pi toki pona li wile lon e sitelen musi taso · ni li ike lili e pilin mi ·
ilo sitelen seme
taso sitelen pona li kama lon nasin Juniko la seme li kama ante · jan li toki e ni : ni la ona li ken sitelen pona lon ilo lili ona · taso ala · tawa ni la ilo sitelen o lon · a ilo li jo ala e ilo sitelen ni la ona li ken ala sitelen pona · tenpo ni la ilo sitelen ni ali li lon nasin Ukosu · taso sitelen pona li lon nasin Juniko la ilo sitelen seme li ken kama lon ilo lili ali ·
ken la ni la kulupu Kuko⁸ li lon e sitelen pona lon ilo sitelen Noto⁹ li pana e ona tawa ilo ali pi kulupu Kuko · pona suli · ni la jan ali li ken oko e sitelen pona lon ilo ona · taso jan ni taso li kepeken sitelen pona : ona li toki pona · ni la jan mute pi kulupu Kuko o pali e pali suli · taso kulupu pi toki pona li lili · ona li wile e sitelen musi la ona a o pali e pali suli ni ·
taso ken la sitelen pona li lon nasin Juniko la jan sin li oko e ni la ona li kama toki pona · ni li pona · taso jan li wile suli ete¹⁰ e kulupu pi toki pona la ona o ni kepeken ala nasin Juniko ·
sitelen seme
taso sitelen pona li lon nasin Juniko la kulupu Kuko li pali e ilo pi sitelen pona la sitelen seme o lon ona · lon nasin Ukosu la kulupu nimi ‹pu› en kulupu nimi ‹ku suli› en nimi tu tu pi kulupu nimi ‹ku lili›¹¹ · ni li pona ken · a jan mute li kepeken nimi ni taso ·
taso nasin toki kulupu li awen kama ante · jan mute li pini toki e nimi ‹yupekosi› e nimi ‹mulapisu› e nimi ‹tuli› · tenpo lili pini la jan mute li kama toki e nimi ‹su› · tenpo lili kama la jan li kama toki e ‹nu› e ‹u› e ‹lu› e ‹ju› e nimi mute ante pi sona ala ·
kin¹² sitelen li kama ante · jan mute li kama sitelen ni e nimi ‹namako› : ona li kili · sitelen ‹epiku› li kama sama sitelen ‹pona› li kama jo e linja san · kin sitelen ‹akesi› li pini jo e noka san tu¹³ li kama jo e noka tu tu taso · ni ali li tan tenpo lili pini ·
ni la kulupu o lon e sitelen seme lon nasin Juniko · a ali la ona li ken ala sitelen ni e toki ona pi tenpo kama · a nasin sitelen pi kulupu ni li awen kama ante · taso nasin Juniko li awen sama lon ali · ni la sitelen pona li ken ala lon nasin Juniko ·
- tan ni:
- Unicode
- tu wan
- Michael Everson
- CSUR
- https://www.kreativekorp.com/ucsur/everson.shtml
- UCSUR
- Noto
- suli namako
- … li lon
- kin la
- luka wan