ala. ona li mute mute tu anu sama! lon. ma li sike sin e suno la mi wile kama sin e kulupu lon ma Elopa. tenpo poka li tenpo nanpa tu wan la kulupu li suli sin li musi a lon insa lawa Pelin pi ma Tosi.

open tenpo

mute suli li kama la, pakala wan li suli: ilo mute pi pali esun li pakala la jan mute li ken ala kepeken ilo tawa lon kon. jan tu wan li kama tan ma weka. jan wan li kama lon tenpo ante. jan ante li kama kepeken nasin ante. jan nanpa pini li kama lon tenpo pini taso. ike a. taso suli la, ona li kama, li lon poka mi. mi olin e jan kulupu. jan wan li kama sona toki pi kulupu ni lon tenpo suno pini wan taso! jan li kepeken toki pi kulupu ni lon ma Pelin, li kama kulupu lon tenpo mute la jan sin ante kin li kama sona e ni, li ken kama lon kulupu ona a!

taso mi seme lon kulupu suli ni? mi toki mute a. mi musi. mi pilin kulupu. open la, mi wile tawa lon ma kasi. mi kama sona e mi mute, mi toki musi, mi lukin e kasi. mi pini la, mi wile moku kulupu. mi tawa tomo moku la mi toki e kulupu pi lipu tenpo e nasin ona. jan mute li kama jo e lipu tenpo kasi kin. ona li pona tawa lukin li pona lon luka.

tenpo seli tawa

tenpo suno ni li tenpo suli kulupu. ale kulupu anu sama li lon. mi wile kama sona e ma e tenpo ona e tomo ona. pona la, jan Tamalu en jan Simiman li toki sona lon insa ma la mi kute e toki sona ona li kama sona. ijo wan li ike e musi: suno li wawa, li seli e ma e mi. mi tawa suli kin. ni li weka e wawa mi a.

mi wile weka a tan suno. mi tawa ma kasi musi. ko ma en ijo musi en jan lili tawa li lon ona, taso suli la supa pona li lon. mi ken lape e sijelo lon ona. kin la mi kama jo e palisa kule. kepeken ona la kulupu li sitelen e sitelen kule tawa supa ma. jan lili tu en jan suli wan li kama wile sona e sitelen. jan li toki e sitelen mi e toki mi tawa ona. a, sona sin.

seli li kama lili. pona. jan li wile pana e lipu lili tawa tomo pi ma weka la mi ken e ni. lipu lili li sama mani tawa lipu pi ma weka la, mi pana e lipu lili mani pi sitelen pona tawa jan mute.

mi wile pana e toki pi jan kulupu tawa ilo mi. mi pana e ijo ken tawa lipu mi la mi ken toki tawa jan mute lon tenpo kama. ilo mi li awen e toki kalama la, mi ken pana e ona tawa ale pi wile kute.

tenpo seli lape

seli li awen a, li suli. ala kulupu li wile tawa a. mi awen lon ma kasi lon pimeja kasi. moku pi mute pona en telo pi mute pona li lon. jan Tepo en jan Kasape en mi Ke Tami li kama e kulupu lon poka. kulupu li sike suli wan la ale li ken lukin e mi tu wan. ni la mi ken pana e sona pi luka pona.

luka pona li seme. jan mute li toki la ona li kepeken kalama uta. taso ale ala li ken kute pona anu kalama pona. nasin toki ante li lon a. kepeken kalama ala la toki jan li ken kepeken luka li ken kepeken sijelo kepeken tawa. tenpo suli pi kulupu ni la mi toki kepeken kalama uta. taso tenpo pi pana sona la kulupu li kama sona e nasin toki kepeken kalama ala.

pona suli la jan sona Lakuse li pana e nasin pi pana sona, e lipu nasin kin tawa mi. nasin pona a. mi kama pana e ijo mute tawa sona kulupu. taso sona li awen ala awen? awen! tenpo pi pana ala la jan li awen kepeken luka pona, li awen wile sona, li awen ken toki kepeken kalama ala. ni li pona wawa tawa mi.

musi suli la mi tu e kulupu. kulupu wan li lukin. kulupu ante li pali. pali ona la ona li lukin e lipu, li toki sama jan pi lipu ni, li tawa sama jan pi lipu ni. nimi pi lipu musi ni li “mijomi telo”. ona li nasa musi la, mi mu mute tan ona. musi ante la kulupu li mu musi pi wan kulupu. mi awen e mu mute lon ilo mi. a, taso seli li lape e mi ale la, ijo suli ante li lon ala.

pini tenpo

pini la, kulupu li kama lili. jan mute li pali anu tawa. taso jan ante li awen, li mute pi suli pona. mi alasa e poki Tona. ona li pan poki, li jo e ijo soweli, e kili mute, e ko telo namako lon insa, li tan a ma ni lon toki pi jan mute. mi kama lukin e tomo esun suwi tu, e tomo pi sitelen musi nasa, e tomo suli pi kulupu oko. tenpo pini la, ma Tosi li tu la, ma Tosi suli en ma Tosi lili li lon. ma lili la, kulupu li wile lawa wawa e jan ona la ona li oko e ona. pilin pi kulupu ike oko la, jan ike li ken lon ale a. ni la, mi kama sona e tenpo ona, e ilo oko ona, e len ona, e nasin len ona. ni li ijo nanpa pini tawa mi wan. mi tan ma kulupu la mi pilin wile pi kulupu sin a. mi wile lon kulupu lon tenpo ante kin!