kalama ala li ken ala ken lon?

tan jan Jon Ke (John Cage) la kalama li lon ali. sina ken tawa tomo ni: jan ante en soweli en pipi en ilo ante li lon ala a. taso sina awen lon. tan ni la kalama kin li awen lon. kalama ante ala la sina kute e tawa pi telo loje lon kute sina. sina kute e kon tawa pi sijelo sina. sina lon la kalama kin li lon.

kin la sina li ken kute e kalama kepeken kute pi insa lawa taso! tenpo la jan ali li kute e kalama musi pona. kalama pini la kalama musi lili li awen lon insa lawa taso. kalama ni li lon ala lon? jan ante li ken ala kute e ona.

jan Jon Ke li wile sona e ni: kalama musi li ken seme? tawa ni la ona li alasa e kalama ante kepeken ilo mute. jan ante li lukin e ilo ni la ona li toki e ni: ni li ilo kalama ala. ni li ilo moku. ni li kasi. ni li lipu. ni li poki telo. taso ona ali li kalama. ma ali en ijo ali la kalama li ken lon.

tan ni la jan Jon Ke li jo e wile sin: kalama musi pi pali kalama ala li seme? ken la sina sona e kalama musi ni. nimi ona li 4'33" (tenpo lili). nasin pali ona li ni. jan li tawa poka pi ilo kalama. jan li open e kalama musi, li luka ala e ilo, li awen lon tenpo lili. kalama musi ni la kalama ali li tan jan tan tomo tan soweli tan kon tawa tan ali poka!

tan tenpo pi jan Jon Ke la kalama musi ni li pana e pilin utala e pilin musi e pilin wile sona e pilin mute ante tawa jan. jan li awen toki: ijo 4'33" li seme?

pini la kalama ala li seme? kalama musi li ken seme? sina pilin e seme?