tenpo pini mute la mi kama tawa tomo ni. mi awen lon ona. open la mi taso li lon tomo ni. taso jan sin li kama. mi sona ala e nimi pi jan ni. taso mi pana e nimi Jali tawa ona. tenpo suli la ona li awen lon tomo ni lon poka mi.

tomo ni li jo e tomo lili tu wan. tomo nanpa wan li tomo pi weka jaki. mi lon tomo ni lon tenpo lili. mi weka e jaki lon tomo mi. tomo nanpa tu li tomo lili mi. tomo nanpa tu wan li tomo pi jan Jali. tomo pi jan Jali li suli a. taso jan Jali li suli kin a. nasa la ona li tawa kepeken noka tu. mi tawa kepeken noka tu tu.

tenpo pi jan Jali ala la mi alasa e moku lon ma kasi. mi tawa weka tan tomo li alasa e kili lili. taso tenpo ni la mi alasa ala e moku. jan Jali li pali e moku lon tomo mi. ona li jo e supa pi pali moku. supa ni la ona li pali e moku mute! ona li pali e kili e pan e kasi e ko jelo. ko jelo li pona mute tawa mi! taso ona li pana ala e moku tawa mi! ona li ike mute. taso tenpo mute la ona li pini ala e moku ona li pana e ona lon poki jaki. taso ona li jaki ala tawa mi! moku mute li lon poki jaki. ni li pona mute tawa mi!

mute la mi en jan Jali li toki ala. ona li lape la mi lape ala. mi lape la ona li lape ala. ni li ike lili tawa mi tan ni: mi wile lape la ona li kalama mute! ike a! tenpo pi mute lili la ona li lukin e mi. ni la ona li kalama a! tan seme? mi sona ala. mute la ona li wile pakala e mi. tan seme? mi sona ala. mi lili. ona li suli. mi ken ala pakala e ona. tenpo pini la ona li pana e ilo moli lon poka pi lupa mi. ko jelo li lon ona. ko jelo… mi wile moku e ona. taso ilo ni li ike. sina wile tawa ko jelo la ilo li pakala e sina! ken la ona li moli e sina. taso mi sona! mi kepeken e palisa li kama jo e ko jelo kepeken ona.

ni ale la ken la sina pilin e ni: tan seme la sina awen lon poka pi jan Jali. open la mi wile weka tan tomo mi. mi alasa e tomo sin. taso tomo ale li nasa! tomo wan la soweli alasa li lon. ike! ona li wile moku e mi. tomo ante la jan ala li lon. pona a. taso tomo ni li lete a. kin la telo mute li lon. lete en telo li ike tawa mi. tomo ante kin la jan li lon. soweli alasa li lon ala. taso jan li moku ala e ko jelo li moku taso e kasi. ike a! mi wile moku e ko jelo. ni la mi awen lon poka pi jan Jali.

tenpo poka la mi pilin e ni: jan Jali li wile weka tan tomo ni. ona li pana e lipu ale ona lon poki suli li weka e supa mute. tan seme la jan Jali li jo e supa lape? mi sona ala. mi jo ala e supa lape. mi ken lape lon ma ale! ken la ona li jo e supa lape tan ni: ona li suli. taso supa lape li weka lon tenpo ni. mi wile ala e ni: ona li weka tan tomo mi.

ona li pana e moku tawa mi. kin la ona li seli e tomo ni. mute la ona li weka e jaki. mi pana e mani ala tawa ni!

ona li weka la mi moku e seme? ona li weka la mi moli tan lete? ona li weka la jan seme li kama? mi wile ala e ni: ona li tawa!

taso jan Jali li jo e nasin. ni la mi wile tawa kin. mi lukin e poki lipu sin. mi tawa lon ona tawa tomo sin.

pilin nasa li lon lawa. seme li lon tenpo kama? mi sona e ni: mi wan ala. jan Jali o esun ala e soweli alasa.