soweli li seme? soweli li ken kalama li ken tawa li ken moku li ken mama e soweli sin. soweli li pakala la ken la ona li ken ala kalama li ken ala tawa li ken ala moku li ken ala mama e soweli sin. mi la nimi «soweli» li jo e kon tu: kon nanpa wan la akesi en kala en pipi en waso li soweli. kon nanpa tu la akesi en kala en pipi en waso li soweli ala. ken la ni li lon tan ni: soweli meli li ken pana e telo mama tawa soweli lili li jo e len li tawa lon ma. mi wile kepeken e kon nanpa wan: akesi en kala en pipi en waso li soweli. taso mi sona ala e ni: jan li soweli ala soweli?

jan li ken kalama li ken tawa li ken moku li ken mama e soweli sin. ni la ona li soweli anu seme? o awen! ken la jan li toki e ni: jan li soweli ala tan ni: jan li pilin. soweli li pilin ala. taso nasin ni li ike tawa mi tan ni: nimi pi ijo tu li ken nimi wan. tomo en poki li poki. jan en soweli li soweli. kili en moku li moku. nimi nanpa tu li nimi kulupu. nimi kulupu li nimi pi ijo mute. o lukin: nimi «moku» li nimi kulupu. kili en pan li moku. ni la nimi «kili» en nimi «pan» li lon kulupu pi nimi «moku». moku en kiwen en palisa li ijo. nimi ale ni li lon kulupu pi nimi «ijo». mi ken toki kin e ni: moku li kili. taso mi ken ala toki e ni: moku ale li kili. moku li nimi pi kon suli. kili li nimi pi kon lili.

tenpo ni la mi sona e ni: jan li soweli. pona a! taso soweli ale li jan ala. tan seme? toki kama la mi kepeken e nimi «soweli» pi kon ni: soweli ni li jan ala li soweli ante:

jan mute li toki e ni: soweli li pilin ala. taso ona li pilin. ken la ona li pilin ala sama sina, taso ona li pilin a. lon la soweli li sona ala e ijo mute. ona li sona ala e toki pi ilo sona, a a a. taso jan mute li sona ala kin. ante la jan lili li pilin lili kin. sona la jan lili en soweli li sama mute. ni la jan lili li soweli ala soweli?

mi la ante suli ni li lon: jan li sona e ni: mi mi. (ken la) soweli li sona ala e ni. jan li lukin e ona lon sinpin pi lukin sama la ona li sona e ni: sitelen lon sinpin ni li mi. soweli mute li lukin e ona lon sinpin pi lukin sama la ona li pilin e ni: sitelen ni li soweli ante. nasa! taso soweli sona li lon kin! soweli suli en soweli kala en soweli jan en waso en kala (lon!) li lukin e ona lon sinpin pi lukin sama la ona li sona e ni: sitelen ni li sitelen ona. taso nasin ni li nasa kin tan ni: soweli alasa li ken ike lukin li ken pilin nena pona. ken la pilin nena la ona li sona e ni: kon ona li kon ona.

ante la jan li ken pilin kepeken nasin ni: ona li lukin e ijo. ona li kama sona e ijo. ona li sona e ijo. ona li pali tan sona ona. mute la soweli li ken ala kepeken e nasin ni. taso jan mute pi ken lili li lon. lawa ona li ante. ni la ona li soweli?

ken la jan li jo e kon. soweli li jo e kon ala. taso mi ken ala alasa e sona ni. ni li sona pi nasin sewi. ale la mi pilin e ni:

nasin tu li lon. nasin nanpa wan la mi toki e ni: jan mute li sona li soweli ala. jan lili en jan pi ken lili li soweli. ike a! nasin ni li ike mute tawa mi. nasin nanpa tu la ni li lon: jan ale li soweli. soweli ale en jan ale li sama. ni li nasin pona tawa mi.

pini la mi wile sona e ni: jan li seme? open la mi pilin taso e ni: jan li soweli Omo Sapijen (Homo sapiens). taso jan ante li lon kin! soweli Omo Eletu (Homo erectus) li jan ala jan? mi la ona li jan! soweli pi noka tu pi sona mute li lon mun la ona li jan! ken la jan ilo li jan kin. mi taso li ken ala toki e ni: ijo li jan ala jan. jan ale o toki e pilin sina!