tenpo pini lili la, mi open kama sona e toki Lasina. ni la, jan mute li wile sona e ni: sina kama sona e toki ni tan seme? toki Lasina li moli! ni li lon. taso toki Lasina li awen pona tawa jan ale. ni li tan seme? lipu ni la, mi wile toki e ni.

ken suli la, sina sona e ni: jan li toki e toki Lasina lon tenpo pini suli. taso ken la, sina sona ala e ni: jan li pini ala kepeken toki Lasina. jan li sitelen kepeken ona lon tenpo pi suli mute! ni la, sina kama sona e toki Lasina la, sina ken lukin e lipu pi tenpo ante mute. ken suli la, sina kama sona e toki Lasina la, sina kama pilin e ni: sina jan pi tenpo pini! ni li lon kin: sina sitelen kepeken toki Lasina lon tenpo ni la, jan pi tenpo kama suli li ken lukin e ona tan ni: toki Lasina li ante ala! (taso la, nimi sin li lon toki Lasina. sina ken toki e ijo sin kepeken toki Lasina. kin la, jan tonsi li ken toki e tonsi ona kepeken toki Lasina!)

ijo pona li ni: sina kama sona e toki Lasina la, ona li wawa e sona sina. ni li tan ni: toki Lasina li suli mute li wile e lawa wawa. ni la sina kama sona e ona la, ona li wawa e lawa sina e sona sina! kin la, nimi mute pi toki mute li kama tan toki Lasina. ni la, sina sona e toki Lasina la, sina ken sona pona e toki ante. ken la, sina sona e ni: nimi “pona” li kama tan nimi pi toki Lasina (bona). nimi “tomo” la, ni li lon kin (domus)!

mi pilin e ijo nasa: toki Lasina li ken toki pi ma ale. ni li tan seme? tan nanpa wan li ni: jan li sitelen kepeken ona lon tenpo suli. ni la, lipu mute li kepeken toki Lasina. kin la, jan li sona pona e nasin pi kama sona pi toki Lasina. ni la, ona li ken pana e sona kepeken nasin pona! tan nanpa tu la, toki Lasina li jo ala e ma. ni la, ma ala li ken toki e ni: toki ni li toki mi! taso la, sina wile kama sona e toki Lasina la, ni li wile e tenpo mute. kin la, toki Lasina li pona tawa jan pi ma Elopa. ken la, ni li lon ala tawa jan pi ma ante. taso la, toki ala pi ma ale li pona ale.

pini la, toki Lasina li pona mute tan ijo mute. ona li pona mute tawa mi. ken la, sina kama sona e ona la, sina kama sona e ni: ona li pona mute tawa sina kin! sina kama sona e toki Lasina la, sina ken kama sona e ijo mute. ken la, sina kama wile sona e toki ante pi sin ala!

Valete, amici et amicae! (o tawa pona, jan pona o)