lipu tenpo li lon ma Patreon! o lukin!

lipu tenpo logo

lipu tenpo

sitelen nasa lon nasin Juniko¹

jan kije Enki tenpo 2023-05-14 lipu nanpa jaki sona sona

nasin Juniko li open lon tenpo sike nanpa 1991 (nasin nanpa pona la #LLLTTAMMMMLLW). nasin 1.0.0 la ona li jo e sitelen 7129 (MMMLLWAMLTT) taso. tenpo li kama la, jan pali pi nasin Juniko li awen pana e sitelen sin. nasin 15.1 li nasin sin la ona li jo e sitelen 149 813 (LLTTAMMMMLLLTWALLTW) a! mute anu seme? lipu ni la, mi toki e sitelen pi nasa mute lon nasin Juniko a.

sitelen O pi oko mute

tomo sewi pi nasin Jesu la, ma li lon kulupu toki Lojanki li kepeken e toki Lojanki². sitelen ni li lukin sama oko luka luka. ona li lon nasin Juniko tan ni taso: ona li lon lipu majuna³ a, jan li kepeken e ona lon tenpo wan taso. nasin kepeken ona li lon nimi tu ni: “серафими многоꙮчитїй” (serafimi mnogoočitii). toki pona la, nimi ni li “jan sewi sewi pi ꙮko mute⁴”. linja ilo mute la sitelen ni li jo e oko luka tu taso. taso ni li tan pakala pi nasin Juniko.

sitelen O oko ante li lon kin, taso ona li musi ala. ona li jo e oko wan taso anu oko tu taso.

drawing of person typing on computer

tan jan Alonola

moku linja Pijanpijanmijen

toki Sonko la moku linja ni (𰻝𰻝面, biángbiángmiàn) li jo e sitelen Kansi pi linja mute. sitelen ni li ken jo e nasin sitelen ante, taso ona ale li pimeja a. sina ken lukin e sitelen pi moku ni lon ni a! sitelen ni li jo e linja 58 (MMLLLTW; lon toki Sonko pi linja mute) anu linja 42 (MMT; lon toki Sonko pi linja lili).

ijo Tawito anu ijo Ototo

toki Nijon la sitelen pi toki Sonko li lon kin. sitelen ni li jo e nasin sitelen tu: nasin nanpa wan la, nimi “ko sewi” (䨺) li lon sewi pi nimi “akesi suli” (龘). nasin toki ona li “たいと” (taito). nasin ante la, nimi “ko sewi” li lon sewi li lon poka a pi nimi “akesi suli”. nasin toki ona li “だいと” (daito) anu “おとど” (otodo). jan mute li toki e ni: nanpa linja la sitelen ni li suli nanpa wan.

nasin sitelen tawa pkoi pini suli walo tan sewi

sitelen ︘ li musi ala. taso nimi ona li musi. toki Inli la, nimi ona li PRESENTATION FORM FOR VERTICAL RIGHT WHITE LENTICULAR BRAKCET. nimi pini lon nimi ni li pakala: ona o “bracket” o “brakcet” ala.

sitelen pi kon moli

tenpo pini la, ma Nijon li jo e nasin nanpa ante. nasin ni li JIS X 0208. ona li jo e sitelen pi toki Nijon e sitelen pi toki ante. taso sitelen 12 (LLT) lon nasin nanpa ni li nasa tan ijo wan sama: jan ala li sona e tan ona. toki Nijon la ona li “幽霊文字” (yūrei moji, “sitelen pi kon moli”). sitelen ale pi kon moli li ni: 墸; 壥; 妛; 彁; 挧; 暃; 椦; 槞; 蟐; 袮; 閠; 駲.

leko lon poka pi linja alasa anpa

pini la, mi wile pana e sitelen wan ante tawa sina: sitelen ⍼ (RIGHT ANGLE WITH DOWNWARDS ZIGZAG ARROW, anu “angzarr”) li… jan ala li sona a! sina ken kepeken e ni lon nasin wile sina. ni la, mi pali e nimi sin tawa nimi ni: lekanpa!⁵

¹ nasin Juniko (Unicode) li nasin nanpa tawa sitelen. sitelen mute lon toki mute mute li lon ona.
² toki Lojanki (словѣньскъ ѩꙁꙑкъ) li “Old Church Slavonic” lon toki Inli. ³ majuna li sin ala. ⁴ sitelen ꙮ li lon la sitelen “o” li lon ala.
⁵ tan “leko” + “anpa”