mi sitelen e lipu lili ni tawa ni: mi wile toki e ijo suli tawa kulupu. ijo suli li ni: nasin Sijon en nasin sewi Juta li ante mute. tan ni la jan li ken toki e ni: kulupu lawa pi ma Isale li ike mute. taso nasin sewi Juta li ike ala! lon la ma Isale li ike tawa jan mute kin pi nasin sewi Juta. pilin mi la jan lawa Netanjaku pi ma Isale li ike mute. tenpo ni la jan mute pi ma Isale li moli la jan mute mute pi ma Pilasin li moli a. jan lili mute kin pi ma Pilasin li moli.

jan Netanjaku en jan poka ona li pali e ni. ona li toki e ni: mi pakala e ma Kasa tawa ni: “mi wile weka e kulupu utala Kamasi”. lon la ona li pakala li moli e jan mute pi ike ala e jan lili mute mute. jan lili pi ma Pilasin en kulupu utala Kamasi li sama ala. jan Netanjaku li sona ala. ona li nasa. kin la ona li pakala ala e utala monsuta. ona li pakala e jan pi ike ala li lon e jan mute pi utala monsuta pi tenpo kama.

mi pilin e ni: jan Netanjaku o tawa tomo awen pi jan ike. mi pilin e ni kin: lon la ona li jan pi nasin sewi Juta ala tan ni: ona li sona ala e toki lawa pi nasin sewi Juta (pi nasin sewi Jesu kin). toki lawa nanpa luka wan li toki e ni: o moli ala e jan!

pilin mi la ma Isale o weka. ma sin o kama lon. ma sin ni la jan pi ma Pilasin en jan pi nasin Juta o awen lon poka sama. ona o sama! ona o kama jo e ijo sama. sama ma Pesije la ma pi kulupu tu li ken, la ma pi jan Juta pi jan Isilan li ken kin. mi awen lon ma Malasija. ma ni la jan pi nasin sewi Isilan en jan pi nasin sewi Puta en jan pi nasin sewi Palata en jan pi nasin sewi Jesu li awen lon poka sama. ona li utala ala a! mi wile e ni: utala pi ma Kasa li kama pini. ike la ma Elopa en ma Mewika li pali pi lili ike tawa ni. toki li mute, taso pali li lili. lon la ma Mewika li awen pana e ilo moli mute tawa ma Isale a! ni li ike mute tawa mi. tenpo ale la tan li lon ala tawa moli jan a!