tenpo open pi toki pona la, ona li toki pi lili nanpa wan ‒ ona taso li lon...

...anu seme?

jan pi mute lili li sona e ni: lon la, ijo toki musi pi lili mute li lon; tenpo open pi toki pona la, ona li tan tenpo pini. ona li toki lon ala, taso ona li sama lili toki.

sike suno nanpa 1995 la jan Ato Kijosi (Aldo Ghiozzi) li pana e musi Og. ona li seme? lon la, nimi ni li kalama sama “mu”, tan ni: musi Og la sina wile toki, taso sina sona ala e nimi mute. sina weka e nimi la, sina o ken luka anu mu!

lon musi ni la, sina pali sama jan pi tenpo pini pi weka mute (ona li jan lon ala, li musi taso; pu ala la, sina ken nimi ni e ona: jan kana¹). taso, jan ni li sama ala jan lon pi tenpo pini weka, li musi taso: ona li lon poka pi akesi monsuta² li pali e ijo musi mute li nasa mute.

jan pi musi Og li sona ala e ijo suli mute pi tenpo mi li sona e ijo lili pi tenpo pini taso. suli la, ona li ken ala toki suli li sona ala e nimi mute. ona la toki pona li toki suli a!

musi Og la, jan li ken toki kepeken nimi pi mute lili a – ona li sona e nimi ni taso:

mi ‒ sina ‒ seli ‒ lape ‒ lupa-kiwen³ ‒ tawa ‒ kiwen – kasi – jo-e-linja-selo⁴ ‒ jaki ‒ lili ‒ moku ‒ ijo ‒ telo ‒ pakala ‒ suli ‒ suno

sina wile toki tawa jan ante la sina o kepeken nimi ni taso! sina ken ala pana e sona pona kepeken nimi ni la, sina o kepeken e tawa luka kin e lukin pi sinpin sina; anu la sina ken alasa sitelen kepeken nimi ala anu sina ken mu.

ken la, sina wile moku la, sina wile e ni: sina en jan pona sina li alasa e soweli. ni la, sina wile toki e ni tawa jan pona sina:

«mi tu o tawa ma pi kasi suli o alasa e soweli pi palisa lawa o moku e ona. mi tu o utala e ona kepeken palisa kiwen: ona li moli la, mi tu o ken tawa e ona tawa tomo kiwen mi, li ken seli e ona li ken moku e ona!»

taso, sina ken ala toki sama ni, tan ni: sina sona ala e nimi! ni la, sina o alasa toki kepeken nimi pi mute lili taso, kepeken luka sina kin.

sina ken toki sama ni:

mi sina tawa kasi pakala ijo moku!

[wile la, sina o pana e luka sina tawa ma kasi; sina o pana e luka lon lawa sina sama palisa lawa; sina o mu sama soweli pi palisa lawa]

kasi kiwen pakala ijo!

[wile la, sina o tawa e luka sina sama ni: sina utala e ijo kepeken palisa suli]

mi sina tawa ijo lupa! seli ijo! moku ijo!

[wile la, sina o pana e luka sina tawa tomo kiwen, o tawa e palisa luka sama seli, o pana e ona tawa uta sina]

ni ali li pilin nasa musi mute, a a a! kin la, sina musi ni kepeken nimi pi toki pona la ni li ike suli ala, tan ni: toki Inli en toki suli ante la nimi wan li jo e kon lili, toki pona la nimi wan li jo e kon suli. ni la, nimi pi nanpa lili kin li ken wawa a.

tenpo tu wan la jan Ato Kijosi en jan Wapin Lose li pana e musi Og:

• 1995 – musi “Og” tan jan Ato Kijosi (Aldo Ghiozzi)
• 2000 – musi “ma Og” (toki Inli la, Land of Og) tan jan Ato Kijosi
• 2007 – musi “Og tan anpa ma” (toki inli la, Og: Unearthed Edition) tan jan Wapin Lose (Robin D Laws)

sina ken lukin e sona e toki pi musi Og lon lipu ni (kepeken toki Inli):

https://index.rpg.net/display-entry.phtml?mainid=3984

¹ijo “kana” li lon ma ala; ona li lon toki taso anu lipu taso anu sitelen taso anu lawa taso anu musi taso.
²akesi monsuta li waso akesi ma pi tenpo pini pi weka mute suli; lon la ona li lon ala poka pi jan pi tenpo pini. jan ni kin la, ona li lon tenpo pini pi weka mute a.
³lupa lon insa poka pi nena suli; toki ante la, ni li ken nimi wan. sina wile musi kepeken toki pona la sina ken kepeken nimi “lupa” anu nimi “tomo”.
⁴toki ante la, ni li ken nimi wan. sina wile musi kepeken toki pona la, ken la sina ken kepeken nimi “ko” anu nimi “linja”.