lipu tenpo li lon ma Patreon! o lukin!
ma nasa - tenpo open
tenpo telo
tenpo pini mute la, telo taso li lon. jan sewi telo li lawa e telo suli ni. taso telo taso li ike la, jan sewi telo li pali e kala, e kasi. kala suli li lon, li lon selo telo la, monsi ona li lon telo ala. monsi ona la, kala ma en kasi ma li lon. jan sewi telo li lukin e monsi, li pilin ike tan ni: monsi pi kala suli li lon telo ala. telo ala la, ona li ken ala lawa. jan sewi telo li kalama li pakala, li tu: jan sewi telo en jan sewi ma.
tenpo ma
ni li tenpo open pi tenpo ma. jan sewi ma li lukin e monsi pi kala suli la, ona li pilin pona. ona li suli e kala, li kiwen e kala. kala kiwen li kala ala, li ma. ma la, jan sewi ma li pali e akesi, e soweli, e pipi, e kasi sin.
tenpo sewi
jan sewi telo li pilin ike tan jan sewi ma. jan sewi telo li wile e ni: telo li lon ma. ni la, ona li pali e kon telo. kon telo li lon sewi, li tawa anpa lon tenpo mute. ni li pona tawa jan sewi telo. taso ni li ike ala tawa jan sewi ma tan ni: telo tan sewi li pona tawa kasi ma.
nanpa tu la, jan sewi telo li wile lawa e kon telo sin. ni la, ona li ante e kala: ona li pana e ilo pi tawa kon tawa kala. kala li ken tawa sewi kepeken ilo ni. tenpo kama la, kala ni li jo e nimi waso.
tenpo ike
tenpo mute la, jan sewi tu li utala ala, li pona. taso tenpo wan la, jan sewi ike li kama. jan sewi ike ni li ken ante e seli, e suno. ona li weka e suno, li lete e telo, li seli e ma. ni la, moli mute li lon. ni la, jan sewi pona tu li kulupu, li utala e jan sewi ike. taso jan sewi ike li lili ala, li jo e wawa mute.
jan sewi pona tu taso li ken ala weka e jan sewi ike. ni la, jan sewi pona tu li pali e jan sewi lili sin mute. jan sewi pona ale li poki e jan sewi ike, li tu e ona. taso ona li ken ala weka e jan sewi ike. ona li poki taso. ni la, tenpo pimeja en tenpo suno li lon; tenpo seli en tenpo lete li lon; ma seli en ma lete li lon.
tenpo jan
jan sewi lili li kama mute. tenpo ni la, ona li sewi ala, li sewi lili taso. ona li lon ma, lon telo, lon sewi, li ante mute. tenpo ni la, jan ni li jan taso. jan ni li pali e tomo, e ilo, e kasi. tenpo ni la, pona en ike li lon poka ona.