tenpo pini mute la, tenpo suno mama li kama lon. mun ni la, tenpo suno mama li lon. ni la, mi toki e sona ona:
tenpo pini mute la, ma Elena la, jan li pana e pona tawa jan sewi Leja (Ῥεία, Rheia). ma Loma la, jan li pana e pona tawa jan sewi Kipele (Κυβέλη, Kybélē). sona sewi pi ma Loma la, jan sewi Kipele li mama suli. ni la, sina o sona: tenpo suno mama li sin ala.
taso tenpo suno mama pi tenpo ni li ante lili. ma Mewika la, tenpo pini la, kulupu meli mute li lon. ona li wile e ni: meli li sama mije, li ken ale. meli An Malija Lipe Jawi (Ann Maria Reeves Jarvis) li open e tenpo suno mama. taso jan ante li open kin e tenpo suno mama. kulupu meli pi tawa utala la, tenpo suno mama li pona tawa mama meli: tenpo suno mama la, mama meli li ken tawa kulupu meli, li ken tawa utala tawa ken meli.
meli Jawi li kulupu lon tomo sewi lon tenpo suno mama nanpa wan tan ni: mama meli pi meli Jawi li moli lon tenpo pini lili. tenpo sike kama la, jan li kulupu kin lon tenpo suno sama. tenpo suno mama nanpa tu la, jan li pana e kasi kule mute tawa mama meli moli ona.
ni la, meli Jawi li pali mute tawa tenpo suno mama meli: ona li toki tawa jan lawa, tawa jan pi nasin sewi, tawa kulupu meli. suli la, tenpo sike pi open utala suli (1914) la, tenpo suno mama meli li kama lon tan kulupu lawa. ona li lon tenpo suno sewi nanpa tu lon tenpo mun nanpa luka. taso ma Juke la, tenpo suno mama meli li lon tenpo suno sewi nanpa tu tu.
tenpo sike kama la, tenpo suno li kama lon ma ante: ma Suwasi (1917), ma Sumi (1918), ma Nosiki (1919), ma Wensa (1919), ma Tosi (1923), ma Esalasi (1924).
ma mute la, tenpo suno meli en tenpo suno mama meli li tenpo suno sama. ma Sipe en ma Anku la, tenpo suno mama meli en tenpo suno mama mije li tenpo suno wan, li tenpo suno mama taso.
kin la, ma mute la, tenpo suno mama mije li lon. taso open ona li ante mute: tenpo pini mute (1910) la, meli Sonola Sa To (Sonora Smart Dodd) li open e tenpo suno mije lon ma Mewika. taso ona li lon ma ante kin lon tenpo ante.
tenpo suno mama la, seme li lon? suli la, jan lili en jan olin li pana e ijo pona tawa mama meli. mute la, jan li pana e kasi kule. tenpo suno mama ni la, o pana e ijo pona, e tenpo suno pona tawa mama sina!
