tan ma tomo Penonpen la mi kama tawa ma tomo Sakon (Saigon) kepeken tomo tawa kulupu. tenpo wan la mi mute li wile tawa poka ante pi nasin telo kepeken supa tawa telo. lon supa tawa telo ni la jan li esun e moku pi musi mute. moku ni li pipi a! pipi li moku pi nasa ala lon ma Tawi lon ma Kanpusi a!
ma Wije li lon ma Asija pi nasin seli lon nasin pi kama suno. sijelo ona li sama linja suli. poka ona la ma Kanpusi en ma Laso li lon nasin pi suno pini. ma Sonko li lon nasin lete. telo suli Sonko pi nasin seli li lon nasin seli lon nasin pi kama suno. lon nasin lawa taso la ma Wije li ma pi jo kulupu. taso lukin la ma Wije li sama ma ante pi ma Asija. jan pi mani mute li lon. jan pi mani lili li lon. taso ma li pona mute li jo e nena suli pona e poka pona pi telo suli. ma tomo suli la jan mute en tomo tawa mute li lon. tomo tawa li mute la, ilo tawa wawa pi sike tu li mute mute a. mi wile tawa poka ante nasin la, tenpo ale la mi pilin monsuta tan ni: mi ken kama pakala a!
tenpo pini la ma Kanse li jo li lawa e ma Wije (sama ma Laso sama ma Kanpusi). lon la tomo sin pi ma ni li sama lili lon tomo pi ma Kanse. taso tomo majuna li sama lili lon tomo pi ma Sonko. tenpo pini mute la ma Asija pi nasin seli lon nasin pi kama suno li kama jo e ijo mute pi sona kulupu tan ma Palata. sama ni: nasin sewi Puta en nasin sitelen toki li kama tan ma Palata. taso ma Wije li ante. ona li kama jo e ijo mute pi sona kulupu tan ma Sonko. sama ni: nasin sewi Puta en tomo pi nasin sewi li sama ma Sonko. tenpo ni la nasin sitelen pi toki Wije li kepeken sitelen Lasina, taso tenpo pini la toki Wije li kepeken nasin sitelen Sonko.
tan nasin seli pi ma Wije la mi tawa nasin lete kepeken tomo tawa kulupu: tan ma tomo Sakon anu Osimin (Ho Chi Minh) tawa ma tomo Anowi (Hanoi). taso mi tawa lon tenpo mun wan li awen lon ma mute. open la mi lukin e ma tomo Sakon e pini pi nasin telo Mekon (Mekong). kama la mi tawa ma Tala (Dalat) lon supa suli pi nena suli. kama la mi tawa ma tomo Owijan (Hoi An) tawa ma tomo We (Hue). tan ma tomo We la mi tawa ma tomo lawa Anowi tawa telo suli Alon (Ha Long Bay). mi lukin e ijo mute mute. ma Wije li pona li musi mute.
mi la ma pona nanpa wan pi ma Wije li lon meso pi ma ni. ona li ma tomo Owijan li ma tomo We tan ni: ona tu li suli mute ala li jo ala e tomo tawa mute e ilo tawa wawa mute pi sike tu. taso nanpa wan la ona li jo e tomo pona mute pi tenpo pini. suli la ma tomo Owijan li pona mute tawa mi. kipisi majuna pi ma tomo ni li sama tenpo pini weka. ona li jo e nasin lili e tomo lili sama tomo majuna pi ma Sonko. ona li epiku. ma kasi pan en telo suli li weka suli ala tan ma tomo ni. ma lili kin li lon insa pi telo suli. mi pilin e ni: ona li sama ma sewi a! ante la ma tomo We li sama lili tawa ma tomo pi ma Kanse. nasin telo Kon Pona li tawa lon insa pi ma tomo ni. jan li tawa wawa ala li pona mute. insa pi ma tomo We la ma tomo lili pi jan lawa pini pi ma Wije li lon. taso ona li pakala tan ni: kulupu utala pi ma Mewika li pana e ilo pakala tawa ona. ni li ike mute. utala pi ma Wije li ike mute a! jan mute pi ma Wije li moli…
ma tomo lawa Anowi kin li jo e ijo musi mute. telo suli Alon li weka ala tan ma tomo lawa. ona li pona lukin tan ni: insa pi telo suli la kiwen suli mute li lon. kiwen ni li sama palisa suli. mi lukin e ona mute lon tomo tawa telo.
lon ma tomo Anowi la mi kama jo e lipu pi ken tawa pi ma Sonko. lon la kama la mi tawa selo pi ma Sonko kepeken tomo tawa linja. pini la lon ma tomo Losawi (Lao Cai) la mi tawa insa pi ma Sonko… tawa mi li awen!
