tenpo mute la mi tawa ma Sonko. ona li ma suli mute li ma musi mute. mi tawa ma mute pi ma Sonko. mi tawa ma ni: ma Mako, ma Onkon, ma Junnan, ma tomo lawa Pekin, ma tomo Sonsin (Chongqing), ma tomo Sentu (Chengdu), ma tomo Sin (Xi’an). ma ale ni li ante li jo e ijo musi mute pi pona lukin. jan tawa la ijo ike wan taso li lon. ma Sonko la jan li pona, taso jan pi mute lili lili li ken toki e toki Inli. tan ni la jan tawa li sona lili e toki Sonko la, tawa li pona. poka la sina ken toki lili e toki Sonko, la jan ale li pilin pona li toki e ijo pona tawa sina a! toki li ike lili la, moku pi ma Sonko li pona mute. mi la moku pona nanpa wan li pan linja a! lili la ona li sama pan linja Italija. lon la jan li moku e pan linja Sonko la, jan li ken sona e ni: tenpo pini mute la pan linja Italija li kama tan ma Sonko. ken la moku pi poki lili Sasi (jiaozi) kin li tawa ma Italija li kama moku pi poki lili Lawijoli.
tenpo ni la ma Sonko li jo e ma Mako e ma Onkon. taso tenpo pini la ma Potuke li jo e ma Mako. ante la ma Juke li jo e ma Onkon. tan ni la ma tu ni li ante tan ma Sonko suli. jan mute li sona e ma Mako tan ni: ona li jo e tomo mute pi sama ma Potuke. poka la ona li jo e tomo mute pi
musi mani. ante la ma Onkon li jo e nasin Sonko mute pi tenpo pini (sama musi utala Kunpu) e tomo palisa sin mute. lon la ma Onkon la jan Puse Li (Bruce Lee) li kama lon. ona li jan pona nanpa wan pi musi utala. ma Kalun (ona li kipisi pi ma Onkon, taso ona li ma pi insa pi telo suli ala) la poka pi telo suli la jan kiwen pi jan Puse Li li lon. ma Onkon la ijo pona nanpa wan li tu tawa mi. ijo wan li lukin pi ma pi insa suli Onkon tan ma Kalun. jan li ken lukin e telo suli e tomo palisa e nena suli lon monsi ona. tenpo pimeja la suno mute pi tomo palisa ni li open la, ona li jasima lon telo suli pimeja. ona li pona mute lukin a! ijo ante pi pona mute li jan kiwen suli pi jan Puta Sijen Tan (Tian Tan). ona li lon sewi nena lon ma pi insa suli Lantaju (Lantau) li pona mute.
ma Sonko suli la ma pona nanpa wan li ma Junnan tawa mi. ona li lon nasin lete pi ma Wije li jo e ijo musi e ijo pona mute mute sama ni: ma pi pan walo mute li sama nasin leko sewi. ma tomo lili pona pi tenpo pini mute li lon. ma tomo ni pi pona nanpa wan li ma tomo Tali (Dali) li ma tomo Lisan (Lijang). tawa pi insa ona li sama tawa lon tenpo pini mute. ona li epiku! ma Junnan la ma pi kiwen lipu suli Silin (Shilin) kin li lon. ona li sama ma pi kasi suli. taso kasi suli li lon ala. ante la kiwen lipu suli li lon a! ma tomo Pekin en ma tomo Sin en ma tomo Sonsin en ma tomo Sentu li ma tomo suli mute. lon ona la jan mute mute li awen. ale la ona li ma tomo sin. taso ona li jo e ijo musi mute kin. ma tomo Pekin la tomo pi tenpo pini en tomo sewi li pona mute. suli la tomo suli pi jan lawa pi tenpo pini en tomo sewi pi kon sewi li pona mute. poka pi ma tomo Pekin la sinpin suli Sonko kin li lon li pona mute. sinpin suli kin li lon ma tomo Sin. taso sinpin ni li sike e ma tomo. tomo palisa pi nasin sewi Puta kin li lon li musi li pona. weka ala tan ma tomo ni la kulupu utala pi ko ma li lon. mi tawa lukin e jan mute mute pi ko ma pi kulupu utala ni. ona li majuna li pona mute. ona li sama jan lon a! ma tomo Sonsin li jo e tomo sin mute mute e nasin telo suli tu (nasin telo Salin (Jialing) en nasin telo Janse (Yangtze) ) e kipisi tu pi tenpo pini. ona li pona mute. suli la kipisi Tesiko (Ciqi Kou) li pona lukin tan ni: ona li jo e tomo lili majuna mute. moku pi ma tomo Sonsin li namako mute, taso ona li pona mute tawa mi. ma tomo Sentu kin li jo e tomo pona pi tenpo pini pi mute lili. taso ijo pona nanpa wan li weka tan ma tomo. ona li jan kiwen suli Puta Tapo (Dafo) lon poka pi ma tomo lili Lesan (Leshan). ona li majuna mute li suli mute mute li lon poka pi nasin telo. oko wan ona li suli sama jan tu a (jan wan lon sewi pi jan ante)! ona li epiku a!
ma Sonko li ma pi suli mute li ma pi musi mute. ona li jo e ijo mute pi pona lukin. mi lukin lili, taso ijo pi lukin mi li pona mute tawa mi.
