Categories
musi toki

kijetesantakalu o!

Categories
musi toki

seme li mi?

tenpo ale la, ma mi li seli
soweli ale la, sijelo mi li suli
mi moku e kasi e kili tan ni:
mi tawa noka lon nasin suli

pata mi li lon tenpo pini
ona li jo e linja, li suli
taso jan li alasa e pata ni
tenpo ni la, ona li moli

kiwen suli tu li lon uta mi
kute mi li sama lipu suli
soweli lili li ike tawa mi
mi jo e nena linja wawa suli

Categories
musi toki

sitelen musi

jan Alonola li toki e sitelen musi.
jan Lewiku li sitelen e sitelen musi.

Categories
musi toki

sitelen pi nasin toki tu

Categories
toki toki musi

toki mun tu

o lukin. mi pana e nimi sama lon nasin tu. ni li ante e toki a. nimi li awen sama. taso toki li kama ante.

mi wile lukin e mun lon pimeja.
suli li ken e weka.
lukin mi tu li lukin e ma.
taso noka li awen lon mun
li weka tan ma.

mi en sina li lon poka ala
li ike tawa mi tu lon tenpo pini.
toki en toki ala la ale li sama.
suwi poka pi mi tu li kama e pilin suli jaki.
o lon ala mi.

ma li weka tan mun mi la
sina awen weka.
sina la mi pilin ike.


mi wile lukin e mun.
lon pimeja suli li ken e weka lukin.
mi tu li lukin e ma taso.
noka li awen lon.
mun li weka tan ma.

mi en sina li lon poka.
ala li ike tawa mi tu lon tenpo.
pini toki en toki ala la ale li sama suwi.
poka pi mi tu li kama e pilin suli.
jaki o lon ala mi.

ma li weka tan mun.
mi la sina awen.
weka sina la mi pilin ike.

Categories
toki toki musi

sina pini kin

tan jan Kapesi Pake

jan mi li sona ala.
mi o kama akesi.
jan ni li sona mute.
ona mute li pakala mute li

wile la, o alasa
e kala tawa seli.
wile ona o sike
e kala ken kalama pi ma ali.

suwi la, mi o kama
la, kala ike lili
li insa li tan wile
li tan pilin sinpin lon moli musi.

jan lili li majuna.
tenpo ona li pini.
jan suli mi li seme?
tenpo pona pi sona ona li ni.

Categories
toki toki musi

jan Makupetu

tan jan Imi

kipisi suli nanpa wan

kipisi lili nanpa wan

(ma pi jan ala)

(kon wawa en suno walo wawa pi tenpo lili. o lon e jan nasa ike tu wan)

jan nasa ike nanpa wan: mi mute li kama poka lon tenpo seme? lon kon wawa anu suno walo wawa anu telo sewi?

jan nasa ike nanpa tu: lon pini pali.

lon kama pona lon kama ike tan utala.

jan nasa ike nanpa tu wan: tenpo nanpa wan la, ni li kama lon. tenpo nanpa tu la, suno li kama weka tawa lukin.

jan nasa ike nanpa wan: lon ma seme?

jan nasa ike nanpa tu: lon ma kasi pi jan ala.

jan nasa ike nanpa tu wan: ma ni tan ni: jan Makupetu li kama lon ma ni.

jan nasa ike nanpa wan: mi kama, soweli o!

jan nasa ike nanpa tu: akesi li kalama.

jan nasa ike tu wan: sama.

jan ale: pona li ike, ike li pona: o tawa lon kon len lon kon jaki.

(o kama weka)

Categories
toki toki musi

toki musi tan jan Sapo¹, tan jan Katulo² musi

tan jan Lapate

mi sona ala e ona, taso ona li awen
lon poka sina, li kute e toki suwi sina,
e mu musi sina la—lukin mi la, ona li
sama jan sewi.

pilin mi ale li weka; mi lukin e sina la,
sona en toki li weka tan mi;
palisa toki mi li kama suli a
lon uta mi.

selo mi la, seli li tawa sama akesi;
telo lete li kama li telo lon selo;
kute li kute e kalama pi ona sama;
oko li pini.

jan Lapate o, pali ala li jo ale
e sina, li pona ike a tawa sina—
pali ala li anpa e jan lawa, li pakala e
ma tomo suli.

¹ Σαπφώ, c. 600 BCE. tan toki ona nanpa 31.
² C. Valerius Catullus, c. 60 BCE. ona li pali sin e toki nanpa 31 pi jan Sapo, lon toki Carmen 51

Categories
sona toki

sike kon

jan li wile tawa sewi. taso jan li waso ala. ma Sonko la, jan li tawa sewi kepeken lipu sewi. taso tawa kon li lon ala la, jan li ken ala ni.

ilo ante pi tawa sewi li lon: sike kon. nanpa wan la, jan li pali e sike kon lon ma Sonko. ma Elopa la, sike kon li lon tenpo kama mute. nanpa wan la, jan sama tu Monkope (Montgolfier) li pali e sike pi kon seli. soweli en waso li tawa kepeken sike ni. tenpo sike sama (1783) la, jan Sale (Jacques Charles) li wile pali e sike kon. ona li kepeken ala e kon seli, li toki tawa jan sama tu Kope (Robert). ona li pali e sike kon pi kon telo.

taso nanpa wan la, jan li tawa sewi kepeken sike kon pi jan tu Monkope. jan Sale en jan sama tu Kope li pali e sike sin pi kon telo. nanpa tu la, jan li tawa sewi kepeken ona. tenpo kama la, jan Pansa (Blanchard) en jan Sepi (Jeffries) li tawa ma Juke tan ma Kanse kepeken sike kon. ike la, jan li ken ala ante e nasin pi sike kon ni. taso jan Sipa (Giffard) li kepeken e ilo tawa. taso ilo tawa ni li ike. kama la, jan Enlan (Haenlein) li kepeken e ilo tawa sin, li ken lawa pona e sike kon.

tenpo sin (2002) la, jan Pose (Fossett) li sike e ma kepeken sike kon, nasa a!

Categories
sona toki

musi palisa

tan jan Masine

tenpo pini la mi tawa ma Somi (Suomi). tenpo open la mi sona lili e ma Somi, taso mi kama sona mute tan ona lon tenpo mi pi ma ni. tenpo suno wan lon tenpo lete la mi lukin e ijo. ona li pona lukin li nasa lukin tawa mi. ijo ni li jo e sinpin mute. jan li pali e ona tan palisa kasi tan linja. mi sona ala e kon ona. mi toki e ni tawa jan pona mi: “ijo ni li seme?”

ona li toki e ni: “toki Somi la ni li ‘himmeli’. jan li pali e ona lon tenpo lete tan ni: ona li pona tawa ona. taso tenpo pini la ona li pali e ona tan ni kin: ona li pilin e ni: musi ni li tomo tawa kon kasi. kon kasi li lon tomo ni la ona li pilin pona li pana e kasi mute tawa jan lon tenpo sike kama.”

mi toki e ni tawa jan pona mi: “ona li pona lukin. mi wile pali e ona kin”. jan pona mi li toki e nasin pali tawa mi. mi pali lon poka ona. sina wile pali e ijo ni kin la o lukin e nasin lon anpa pi toki ni. (nasin ante li lon. wile sina la sina ken pali e ijo palisa pi sijelo ante mute, taso lon ni la mi toki tan nasin wan pona taso tawa ni: jan li ken pali e ijo palisa lili.)

pali nanpa wan: o alasa e palisa. kasi tan ma telo la palisa ona li pona tawa ni. taso sina ken kepeken kasi lili tan ma sina. ona o jo e lupa lon insa ona. sina wile ala anu ken ala kepeken palisa kasi la o kepeken palisa pi sijelo ante. sina kepeken e palisa kasi la o awen e weka telo tan palisa sina. ni li ken wile e tenpo suli.

pali nanpa tu: o kipisi e palisa. ni la sina kama jo e palisa luka luka tu pi suli sama. (jan li toki e ni: nanpa palisa li luka luka tu tan ni: mun pi nanpa sama li lon sike suno.)

pali nanpa tu wan: o jo e linja suli. o linja e palisa tu wan.

pali nanpa tu tu: o wan e palisa nanpa wan e palisa nanpa tu wan. ni la sijelo pi sinpin tu wan li lon. ona li ni lukin:|

pali nanpa luka: o linja e palisa tu o pali e sijelo sin pi sinpin tu wan lon linja palisa. ona li ni lukin:

pali nanpa luka wan: o awen pali e pali nanpa luka tawa tenpo ni: sina jo e sijelo luka pi sinpin tu wan en sina jo e palisa wan taso lon linja ala. pona la linja sina li jo e lukin ni:

pali nanpa luka tu: o linja e palisa sin o wan e ona tawa open linja.

pali nanpa luka tu wan: ma tu la palisa tu taso li linja. o linja sin e pini sijelo ona. sina kama jo e musi palisa lili!

wile sina la o ken pali e sijelo ni mute pi suli ante mute o wan e ona. musi pona!