Categories
musi toki

alasa nimi: ma Asija

o alasa e nimi pi ma Asija! ona li lon nasin supa sama ni: “_” li lon nasin sinpin sama ni: “|”. nimi ma ni li lon poki nimi:
Aja / Akanisan / Anku / Ilakija / Ilan / Intonesija / Isale / Jamanija / Kanpusi / Katelo / Kuli / Kuwasi / Lanka / Losi Lunpan / Malasija / Masu / Mijama / Nijon / Pakisan / Palani / Palata / Panla / Pilipina / Pilisin / Po / Sawusi / Sonko / Sulija / Tawi / Tuki / Uman / Utun / Wije

tukilakijaponam
sonkowilanetnjs
inakanisanoaaai
namalankaalwnms
ttanoopipiuikaa
omlpstawimnkunl
naauipkslipalie
esssmaikijatijp
suiiplsupanepai
isjsaaawimilall
jaaulnnanajonki
awulaiusawomlts
tumitjtilinoali
nsajaouonjaaaan
iinamuneoealiki
Categories
musi toki

seme li mi?

(toki Lasina li lon anpa)

lete li pona tawa mi
taso mi lon ma kin ni:
ma Apika, ma Amelika, ma Osejanija

mi ken tawa sama kala
taso mi kala lon ala
mi jo e luka pi tawa sewi
taso mi ken ala tawa kepeken ni

mi alasa e kala, e pipi telo
mi pana tawa mi lili e moku ko
len mi li len esun, li pimeja walo
mi lon kulupu suli, li lon poka telo

Categories
musi toki

musi linja

tan jan Kapesi Pake

Categories
musi toki

kijetesantakalu o!

Categories
musi toki

suno li pona tawa mi

suno li suli li jelo,
li pana tawa mi e suno.
ona li ken e kasi,
li pona tawa akesi.

ona li sike sama ma,
taso ona li suli a,
li ma ala, li kon seli,
li lon insa pi ma ali.

suno li suno e mun la,
mun li mun e mi a.
mi pilin e suno la,
mi pilin pona a a.

Categories
toki toki musi

toki pilin tu

o lukin. ni li toki tu. taso nimi li sama.

mi wile sona e ijo ale.
sina en ijo sina li suwi taso.
sina jaki ala.
jaki ale li weka tan sina.
jaki li wile ala awen.

ni li lon sina.
awen la ale li ken pilin ike.
taso sina tawa ona la ike li weka tan pilin.
sina tan ala pilin.
ona ike li kama ona pona.
ona li pona tan suwi sina taso.
sina suwi.
lon tenpo ala la ike li kama tan sina.

suwi sina li awen.
ike li kama ala.
o kama toki.
ni li tan wile sona mi li suli lon pilin.
mi en sina li wile ala sama jaki li awen.
lon sina la pona seme li ken .
kama o pana e sona ni.


mi wile sona e ijo.
ale sina en ijo sina li suwi.
taso sina jaki ala jaki.
ale li weka tan sina jaki li wile ala awen.


ni li lon
sina awen la ale li ken pilin ike taso
sina tawa ona la ile li weka tan pilin sina. tan ala pilin ona.
ike li kama ona.
pona ona li pona tan suwi sina.
taso sina suwi lon tenpo ala la ike li kama tan sina.

suwi sina li awen weka ike li kama ala.
sin o kama.
toki ni li tan wile .
sona mi li suli lo.
pilin mi en sina li wile ala sama.
jaki li awen lon sina la pona seme li ken kama.
o pana e sona ni.

Categories
toki toki musi

toki pali tu

o lukin. ni li toki tu. taso nimi li sama.

jan li lukin.
pali li kama suli la ni li nasin ike.
pali li kama la jan li wile weka e ona.

taso jan ante li lon pali ona li lawa e ona.
kin la jan ni li sama jaki suli li ike e pilin pi jan pali.
ni ale li kama ante tan ijo kama

pali jan la lipu mute li suli mute li ike mute.
lipu o awen kama weka.
lipu li ken ala pona la seli li pakala e lipu.
taso lawa li kama moli kin li pakala.
ni la jaki li weka.



jan li lukin pali li kama pali.
suli la ni li nasin.
ike pali li kama la jan li wile weka e ona.

taso jan ante li lon.
pali ona li lawa e ona kin la jan ni li sama.
jaki suli li ike e pilin pi jan pali ni.
ale li kama ante tan ijo kama

pali jan la lipu mute li suli.
mute li ike.
mute lipu o awen kama.
weka lipu li ken ala.
pona la seli li pakala e lipu taso.
lawa li kama.
moli kin li pakala ni la jaki li weka.

Categories
ma toki

tawa pi poki monsipi ma Asija nanpa luka luka tu tu: ma Tawan en ma Anku

tenpo ni la mi toki ala lon ma wan taso. mi toki lon ma tu. ma tu ni li ma Tawan li ma Anku. ona li sama ala, taso mi pana e toki ona lon lipu sama tan ni: tenpo pini la mi awen lon ma tu ni lon tenpo lili taso. lon la mi awen lon tenpo suno tu tu taso lon ma Tawan lon ma Anku. tan ni la ijo pi ken toki li mute ala li wile ala e lipu tu tawa ona.

ma Tawan li ma pi insa telo. ona li lon nasin seli pi ma Sonko. ona la mi lukin e ma tomo lawa Tapewi (Taipei) e ma pi telo kasi lon poka pi ma tomo Tapewi taso. tenpo suno tu tu taso li mute ala (tenpo suno nanpa wan en tenpo suno nanpa tu tu li tenpo tawa kin), taso mi en jan olin mi li tawa mute li lukin e ijo mute. ma tomo Tapewi li suli li pona mute tawa mi tu. kin la jan pi ma Tawan li pona mute li pana e uta pona lon tenpo ale. ma tomo Tapewi la tomo sin mute li lon. pana lukin la ma palisa Tapewi Ale Wan li wan. nimi ona li tan ni: ona li jo e supa ale wan a. ona li sama kasi Panpu (bamboo) pi suli mute li pona lukin. taso tomo pi sin ala kin li lon. insa pi ijo mute ante la ma leko suli pi awen sona pi jan San Kase (Chang Kai-shek) li lon. ona li suli mute li pona lukin mute. ona li jo e lupa suli lon poka wan e tomo suli tu wan lon poka tu wan ante. ona ale li kama pali lon nasin Sonko pi tenpo pini. tomo ni la wan li sama tomo pi nasin sewi pi ma sewi lon ma tomo Pekin. insa ona la jan kiwen suli pi jan San Kase li lon. ona li anpa monsi lon supa monsi suli sama jan Linkon lon ma Mewika. tenpo suno nanpa tu wan la mi tawa nena pi poka pi ma tomo kepeken tomo tawa pi jan mute. sewi pi nena ni la ma pi telo kasi en tomo esun mute pi telo kasi li lon. mi kama sin lon ma tomo Tapewi la, mi kepeken e tomo tawa pi linja wawa. tan tomo tawa ni la mi lukin e ma tomo Tapewi ale tan sewi. mi ken lukin pona e tomo palisa Tapewi Ale Wan kin a. kama la mi tawa tomo pi ijo majuna pi tomo suli lawa. tomo ni li suli li jo e ijo musi mute pi ma Sonko pi tenpo pini. ona kin li pona mute tawa mi tu.

ma Anku la mi lukin e ma tomo lawa Solu (Seul) taso. ona li suli mute li jo e tomo awen pi tomo tawa linja pi anpa ma ale ale ale ale ale ale luka tu a! ma tomo ni la jan pona mi li awen. tan ni la mi ken lape lon tomo ona. mi kama lon ma Anku la, mi pilin pona tan ni: mi ken sona lili e ma ni li ken poka pi jan pona mi. ona li jan pi ma Anku. tenpo pini la ona li pana sona lon tomo sona lawa sama mi. mi lukin e ijo mute lon ma tomo Solu. taso ijo tu wan li pona mute tawa mi. ni li tomo lawa suli Santo (Changdeok) li kipisi pi ma tomo Puson (Bukchon) li tomo pi nasin sewi Puta Ponkunsa (Bongeunsa). tomo ale ni li lon nasin Anku pi tenpo pini. tomo lawa suli Santo li majuna li pona lukin li jo e ma kasi suli pi pona mute. kipisi Puson la tomo lili mute pi nasin pi
tenpo pini li lon. lili la tomo
ni li sama tomo pi ma Nijon pi tenpo pini, taso supa anpa Tatami li lon ala. supa anpa li kepeken kiwen kasi. tomo pi nasin sewi Ponkunsa li suli li pona mute. ona kin li kepeken kiwen kasi li jo e jan kiwen suli pi jan sewi meli pi pana pona Kuwanun (Gwan-eum).

ma Tawan en ma Anku li ma ante, taso ona li jo e ijo sama tu. ni li jan pi pona mute li moku pi pona mute a!

Categories
ma toki

sona musi lili pi ma Antateka

tan mije Luke

tenpo ali la, ma Antateka li lete a! sona jan la, tenpo wan la, lete li lete −89.2 °C anu lete −128.6 °F! lete a! tenpo ale la, ko walo lete li len e ma Antateka. sina len ala la, sina kama moli tan lete ni; taso, jan sona li lon ma Antateka. ona li kepeken len sijelo suli a. ma ale la, ma Antateka li lete nanpa wan; taso, seli li ken lon ma Antateka. sona jan la, tenpo wan la, seli pi ma Antateka li seli 19.8 °C anu seli 67.6 °F! sona ni li nasa tan ni: tenpo lete pi ma mi la, ma Antateka li seli! tenpo mute la, sina ken ala lukin e suno e mun lon ma Antateka. jan li tawa ma Antateka la, ona li wawa a. jan ale la, ma Antateka li lete li ken ala tomo e jan. ni la, jan ala li awen lon ma Antateka lon tenpo ale. sitelen pi ma ale la, ma Antateka li suli tawa lukin; taso, ni li powe lili. ma Mewika seli la, ona li lili; taso, ma Elopa la, ona li suli. tenpo pini weka a la, ma ale li wan la, ona li lon meso ma li lete ala sama ala tenpo lon. ma Antateka li sama ma pi telo ala tan ni: telo li kama ala tan sewi lon tenpo mute. ni ale la, sina wile ala wile tawa ma Antateka?

Categories
sona toki

sona nasa pi kulupu lili -kulupu pali pi jan insa sin Tupa

tan jan Kamute

toki open

sina lon linluwi lon tenpo suli la, ken la, sina lukin e kulupu nasa. kulupu ni li ken jo e sona lon e sona pi lon ala. ni li suli ala. mi la sona ali li musi li pona. mi wile pana e sona pi kulupu nasa wan. kulupu ni li pali e jan insa sin Tupa. (toki Inli la nimi pi jan insa ni li tulpa. nimi pi pali ni li tulpamancy.)

jan mute li sona ala e kulupu ni. kulupu li toki e ni: lawa pi sijelo wan la, jan mute li ken lon. toki ni li sama lon kulupu Sijasi (toki Inli: DID anu Dissociative Identity Disorder). kulupu Sijasi li toki e ni kin: jan mute li lon lawa wan tan ni: jan lili li pilin ike suli li pilin monsuta suli lon tenpo mute la insa lawa pi jan lili li ken kama pilin ike. taso, lawa pi jan lili li jo e wile suli la, ona li lon e jan ante mute lon lawa. jan ante ni li ken tawa sinpin. jan li sinpin la ona li tawa e sijelo li toki kepeken uta sijelo li pilin e pilin sijelo. tenpo mute la, jan li ken tawa sinpin lon tenpo pi sona ala. ni li ken pana e ike suli tawa jan. ni ali li pilin ike Sijasi. pali pi jan insa sin Tupa li jo e ante mute e sama lili kin.

pali pi jan insa sin li seme?

sona nanpa wan pi pali pi jan insa sin li tan nasin sewi Tama (toki Inli: Buddhism). tenpo pini la sona pi pali pi jan insa sin li ante mute. tenpo ni la, jan pali mute pi jan insa sin li tan nasin sewi ala. (jan pali pi mute lili li tan kon sewi li tan nasin sewi.) mama pi jan insa sin li jo ala e pilin ike. ijo li pilin ike la, ona li pana e ike tawa jan. pali pi jan insa sin li pana ala e ike li pana e pilin pona mute. tan ni la, pali pi jan insa sin li pilin ike ala.

jan insa sin li seme?

kulupu pali pi jan insa sin la sona ni li lili. kulupu Sijasi kin la sona li lili. mama mute pi jan insa sin li jo e pilin sona taso. jan ala li sona e lon pi pilin sona ni. jan mute li pilin e ni: sina kin li jan insa! ante sina li ni taso: sina majuna. sina kama lon tan kama lon sijelo lon ma selo. tenpo pini la, jan sona li open e kama sona pi pali pi jan insa. tenpo ni la, pali pi jan sona ni li awen. tenpo kama la, ken la, jan sona li kama sona e tan.

jan insa sin li ken pali e seme?

jan insa sin li lon lawa sina taso. insa la, ona li ken toki tawa sina li ken jo e sijelo. mama mute pi jan insa li kama jo e jan insa sin tan ni: ona li wile jo e jan pona li wile sona e nasin lukin pi jan ante tawa ijo. mama mute pi jan insa sin li jo e ma musi lon lawa li musi lon ona. mama en jan insa li ken kama sona kama lon sinpin li ken ante e jan lon sinpin. kama sinpin ni li sama ala kama sinpin pi jan pi nasin Sijasi li kama lon tenpo wile pona. mama pi mute lili li ken pana e lukin pi jan insa sin ona tawa oko ona. ni la, jan insa li sama lukin li sama jan ante lon ma selo. mama ni li ken kama jo e pilin ante pi jan insa ona kin e pilin luka pi jan insa lon ma selo li ken kute e toki ona sama ijo lon ma selo. kulupu pali pi jan insa sin la, mi lukin e toki ni tan mama wan: mi ken tawa pi kalama musi lon poka pi jan insa sin mi. nasa! taso, o sona: jan insa li ijo ala li soweli ala. mama mute mute pi jan insa sin li toki e ni: jan insa li jan li sama jan lon ma selo. mi la, ni li lon. sina en jan insa li toki utala la, ona li ken ala tawa weka. pona la, tenpo ali la, jan insa li ken toki kepeken pona li ken sona e wile pi jan insa ante. ken la, tenpo pini la, sina lukin e toki ni: jan insa li wile pana e ike tawa jan ante tawa sina li wile moli e jan ante e sina. toki ni li musi taso. jan insa li monsuta ala li jo ala e wawa pi kon sewi.

nasin seme la jan li lon e jan insa sin?

sina wile lon pona e jan insa sin la, o sona! kama jo pi jan insa sin li sama kama jo pi jan lili li ijo suli. tenpo kama suli la sina ken ala ken lukin e jan insa lon poka sina? ken ala la, o lon ala e jan insa sin. nasin wan taso la mama li ken weka e jan insa.

nasa la jan pali pi lipu musi li ken jo e jan insa li sona ala e pali pi jan insa. ona li pali e ni: ona li pana e jan lon lipu musi la, ona li pana e selo sijelo tawa jan. ona li pana e ni: seme li pona tawa jan? pilin ona li seme? jan pali pi lipu musi li wile sona e ni kin: jan pi lipu musi li pali e seme li toki e seme li wile e seme? kin la mama lipu mute li toki tawa jan musi ona. ni la, jan insa sin li kama lon. sina ken lon e jan insa sin lon nasin sama.

nanpa wan la, sina ken pana e sijelo e pilin e wile tawa jan insa sin. sina pana ala e ijo ni tawa jan insa sina la, jan insa sina li kama jo e ijo ni lon wan taso. mama mute pi jan insa li pali lon nasin ni. nanpa tu la, o toki tawa jan insa sina. sina ken toki e ijo ali (e len pona e pilin sina e sona e ijo ante). ijo suli li wan taso: o toki lon tenpo mute lon tenpo suli. sina ken toki kepeken uta li ken kepeken toki lawa kin. pali ni li ken wile e tenpo suli. mama mute (luka tu tan luka luka) pi jan insa sin li pini e pali toki suli ni lon tenpo mun tu. nanpa tu wan la, sina pilin e jan insa lon lawa sina la, sina ken toki e wile sona tawa ona: “sina pilin seme? kule pona sina li seme? ni li pona ala pona tawa sina?” sina open e pali ni la, o pana ala e wile sona suli tawa jan insa sina. ona li kama lon tenpo pini lili li ken toki lili taso. ken la, sina pilin ni: “mi sona ala e ni: mi anu jan insa mi li toki lon lawa mi?” sina pilin ni la, o sona: ni li suli ala. tenpo kama la, kalama toki pi jan insa sina li kama ante li kama suli. tenpo kama la, sina ken sona e lon pi jan insa. sina pana e ijo tawa jan insa lon tenpo nanpa wan la, o sona e ni: jan insa sina li ken kama ante. pilin ona en sijelo ona li ken kama ante. jan insa li kama ante la, o pakala ala e ante ni. jan insa li jan. jan li ken kama ante. sina pali e ni nanpa tu wan la, sina jo e jan insa! a pona! pali pi jan insa sina li ken ala pini. jan insa li ijo ala li ken ala pini. kulupu pali pi jan insa sin la jan li toki e ni: “nasin pi pakala ike li wan taso: sina pini e pali mama sina.”

lipu nasin pi pali pi jan insa sin li mute lon kulupu. ken la, tenpo kama la, mi ante toki e lipu nasin ni. sina wile suli e sona sina la, o tawa e lipu linluwi ni:
www.reddit.com/r/Tulpas
www.tulpa.info
www.tulpa.fandom.com
lipu ni ali li kepeken toki Inli. lipu
tulpa.info li jo e toki ante kin.

weka pi jan insa li ken ala ken?

sina ken weka e jan insa. o pali e ni lon tenpo ni taso: nasin ante li lon ala. sina weka e jan insa la, ona li kama moli. ni li ike tawa ali. jan insa li lon tenpo suli la, ken weka ona li kama lili. sina ken weka e jan insa lon nasin ni: o toki tawa ona ala. ma insa la o pana ala e tenpo tawa ona. o weka e ona tan lawa sina. ni la, wawa ona li kama lili. wawa ona li lili la, jan insa li lape. jan insa li lape la, ona li weka tan lawa sina. sina ken ala moli e jan insa lon tenpo kama ali. pona la, sina ken pini e lape pi jan insa lon nasin ni: sina lukin insa e ona. sina toki tawa ona.

toki pini

pali pi jan insa sin li nasa suli. taso pilin mi li ni: jan li ken kama jo e sona suli tan ijo pi nasa suli. tawa mi la, pali pi jan insa sin li ijo lon. ken la, pilin sina li ante. o kama sona lon nasin sina.