ale la, suno mute li lon. taso suno mi li suli tawa mi. ona li ken e ni: soweli en kasi li lon ma ni. suno ante lon ma ni la, suno mi li lili ala, li suli ala. suno ante li jo e kule mute: ona li laso, li loje, li jelo, li walo. suno lon la, suno loje lili li lili a. taso suno ale la, suno kapesi li suno lili a. taso suno kapesi li sama ala suno mi. suli la, suno walo lili li lon kin. suno suli li laso, li loje. taso suno loje suli li suli a. suno mi li suno jelo lili. sike ma mi la, suno li suli a!
tenpo pini mute la, suno li kama lon. tenpo kama mute la, ona li moli. o pilin ike ala: tenpo ni li weka mute a. nasin seme la, suno li pali e suno? insa suno la, wawa mute li lon. wawa ni la, kon Itokenijun (kon nanpa wan, H) tu li wan. kon Itokenijun tu li wan la, kon Elijun (kon nanpa tu, He) en wawa mute li lon. wawa ni li kama suno, li kama seli. suno la, kon Elijun mute en kon Itokenijun lili en ijo ante lili lili li lon. seli suno li seli mute (5772 K)!
suno mi la, mun luka tu wan li lon. mun wan ni li sike ma mi. mun kiwen tu tu li lon. mun kon tu tu kin li lon. sike ma mi taso li jo e soweli, e kasi.
tenpo pini mute la, jan sona li toki e ni: ma mi li lon insa ale. taso jan Nikola Kopeniku (Nikolaus Kopernikus) li toki e ni: suno mi li lon insa ale! jan Jokane Kepa (Johannes Kepler) li jan sona kin. ona li lukin e sike ma loje la, ona li ken pana e sona ni: jan Kopeniku li toki e sona lon! taso tenpo ni la, mi mute li sona e ni: suno ante mute li lon! kulupu suno mi li kulupu suno wan taso lon sike suno suli.
tenpo pimeja la, suno li lon ala, mun taso li lon. taso ken la, tenpo suno la, suno li lon ala! ni li tenpo pi suno pimeja. tenpo pini la, suno pimeja li ike tawa jan. jan li toki e ni: suno pimeja li lon la, ike li kama. taso tenpo ni la, mi mute li sona e ni: suno li pimeja la, mun li lon
sinpin suno. ni la, mi mute li ken lukin ala e suno, li lukin taso e mun, e sike suno.
